Тәрбиеленушілердің бүгінгі тұрмыс-тіршілігі кең көлемде талқыланған алқалы жиынға Арыс қаласының әкімі Мұрат Қадырбек, Департамент басшысының бірінші орынбасары Мирас Қарғабай, облыстық адами әлеуетті дамыту басқармасының басшысы Рахымбек Жолаев және облысқа қарасты балалар ауылының директорлары, сондай-ақ бейнебайланыс режимі арқылы Мәжіліс депутаты Әлия Әбсеметова қатысып, ата-ананың қамқорлығынсыз қалған бүлдіршіндердің қалауы мен ұсыныс-пікірлерін тыңдады.
Балалар ауылының директорлары бірқатар ұсыныстарын ортаға салды. Атап айтсақ, түркістандық тәрбиеленушілерді Түркістан қаласына тіркеп, үй алу кезегіне тұрғызуда туындайтын мәселелерді шешу, балаларды жазғы демалыс кезінде Көкшетау, Қапшағай қалаларындағы «Балдәурен» оқу-сауықтыру лагеріне жіберу, 2002 жылдан бері күрделі жөндеу жұмыстарын көрмеген «Бауыржан отбасы үлгісіндегі балалар ауылын» жаңарту, «Төле би отбасы үлгісіндегі балалар ауылына» тиесілі 10 гектар жер телімін игеруге ықпал ету мәселелері бойынша ұсыныстар айтылды. Сондай-ақ жетім балалар мен ата-ана қамқорлығынсыз қалған балаларға арналған ұйымдарды кезең-кезеңмен қысқарту үшін тәрбиеленушілерді асырап алуға, патронатқа, қомқоршылыққа алуға киелі мекендегі азаматтарымыз ықылас білдірсе деген жанашырлық ниеттерін жеткізді. Облыс бойынша жалпы саны 175 жеткіншек тәрбиеленіп жатқан 3 балалар үйінің бүгінгі әлеуетінен кең мағлұмат алған Әлия Әбсеметова аталған ұсыныс-тілектерді алдағы уақытта Мәжіліс отырысында назарға салатынын айтты.
