Облыс орталығынан таяқ тастам жердегі Ұлан ауданының экономикасы уақыт өткен сайын дамып, әлеуметтік ғимараттар бой көтеруде. Жақында, Тұңғыш Президент күні аудан орталығы – Қасым Қайсенов атындағы кентте аудан әкімі Айдос Садықов жұртшылықпен кездесті, орталық алаңда жәрмеңке өтіп, ет, сүт өнімдері арзан бағамен саудаланды.
Облыс орталығынан таяқ тастам жердегі Ұлан ауданының экономикасы уақыт өткен сайын дамып, әлеуметтік ғимараттар бой көтеруде. Жақында, Тұңғыш Президент күні аудан орталығы – Қасым Қайсенов атындағы кентте аудан әкімі Айдос Садықов жұртшылықпен кездесті, орталық алаңда жәрмеңке өтіп, ет, сүт өнімдері арзан бағамен саудаланды. Кездесуде Айдос Қабдуахитұлы жыл басынан бері 25 миллиард теңгенің өнеркәсіп және ауыл шаруашылығы өнімдерінің шығарылғанын айта келіп, жақында «Қолжетімді баспана» бағдарламасы бойынша 80 пәтерлік тұрғын үйдің іске қосылатынын, іле-шала 100 пәтерлік тұрғын үйдің салынып бітетінінен хабардар етті. Украинка ауылында 1000 бастық бордақылау алаңы, Айыртау ауылында да осындай алаң іске қосылатынын айта кетті.
Түстен кейін Айыртау ауылдық округінің Завидное ауылында екі әлеуметтік нысанның салтанатты ашылуы болып өтті. Оған ауыл, аудан ардагерлері қатысты. Гүлмира Нұрханова шағын несие алып, әлеуметтік дүкен ашыпты. Ондағы баға арзан, мәселен, бір бөлке нан 40 теңге, бір кило жоғары сортты ұн 56 теңге тұрады. Сондай-ақ, шекілдеуік майы, қант, басқа да тауарлар қала дүкендеріндегі бағамен бірдей. Ауыл тұрғындары қуанышты. Енді керегімізді облыс орталығына бармай-ақ, әлеуметтік дүкеннен сатып алатын болдық, дейді олар.
Аудан әкімі Айдос Садықов әлеуметтік дүкеннің ашылуымен құттықтап болған соң дүкенге кірді. Шағын, жинақы дүкенде қажетті заттардың барлығы бар.
Бұдан кейін жиналғандар 80 орындық дәмхананың ашылуына қатысты. Ерлі-зайыпты Жұмабек, Бақытжан Рағызбаевтар «Даму» бағдарламасы бойынша 1 миллион теңге несие алып, дәмхананы іске қосқан. Оның ашылу салтанатында аудан әкімі, ардагерлер Надежда Федорова, Зияда Уәлиева сөз алып, бұрындары ауылда дәмхананың болмауынан той-томалақ жасаудың қиындық туғызып келгенін айтып, енді осы мәселенің шешілгендігіне ризашылығын білдірді.
Айта кету керек, мұның алдында ауылдың тағы бір кәсіпкері Сұлухан Ағзамова 70 орындық жекеменшік балабақша салып берген екен. Балабақшасы, әлеуметтік дүкені мен дәмханасы бар ауылдан басқалар үлгі алып жатса, қанеки.
Оңдасын ЕЛУБАЙ,
«Егемен Қазақстан».
Шығыс Қазақстан облысы,
Ұлан ауданы.
Суретте: Завидное ауылындағы әлеуметтік дүкеннің ашылу салтанаты.
