Аймақтар • 01 Наурыз, 2021

40-қа жуық адамды ажалдан арашалаған шымкенттік дәрігер туралы не білеміз?

282 рет
көрсетілді
2 мин
оқу үшін

Жол апаты, жүкті әйелді көлікте босандыру мен түрлі оқыс жағдайлар. Біз үшін мұндай жағдайлар таңғаларлық болса, фельдшер мамандары үшін күнделікті қызмет. Сондықтан да бұл жұмысты тек сол істің нағыз мамандары, адам өмірін сақтауды - борышы деп санайтын абзал жандар ғана атқара алады. Солардың бірі- Мейрамбек Арғынбаев.

40-қа жуық адамды ажалдан арашалаған шымкенттік дәрігер туралы не білеміз?

М.Арғынбаев - қалалық жедел жәрлем станциясындағы №1 қосалқы станцияның қарқынды терапия бригадасының дәрігері болып жұмыс істейді.

Білікті маман 11 жылдан бері денсаулық сақтау саласында қызмет етіп келеді. Көбіне ауыр жағдайдағы науқастарға көмек көрсететін маман реанимациялық көмек көрсетуде үздік екенін дәлелдей білген. Осы күнге дейін фельдшер клиникалық өлім жағдайындағы 40-қа жуық азаматқа сәтті реанимациялық көмек көрсетіп, ажалдан арашалап қалған.

Фельдшер өзінің мамандығын мақтан ететінін айтып, халықтың саулығы үшін аянбай еңбек етемін дейді.

– Осыдан бір ай бұрын кезекшілік кезде қаладағы «Теріскей» шағын ауданынан шақырту түсті. Біз барған кезлде ес түссіз халде керуетте жатқан ер кісіге бірінші медициналық көмек көрсеттік. Науқасты тексеріп жатқанда кенеттен жүрегі тоқтап қалды. Уақыт жоғалтпай дереу көмекшіміз екеуміз реанимациялық іс шараларды жасап, 4 минут ішінде науқасты клиникалық өлім жағдайынан шығардық. Кейін науқасты жүрек орталығына жедел жәрдеммен жеткіздік. Науқастың денсаулық жағдайы жақсарып, отбасына аман-есен оралды, - дейді фельдшер.

Жас дәрігер біліктілігінің арқасында көптеген науқастардың алғысын алған. Ол «жедел медициналық көмек», «реаниматология және анестезиология» бағдарламалары бойынша біліктіліктін арттырған.