Таяуда «RG GOLD» кәсіпорны ауыл мектебіне жаңа автобус сыйлады. Жалғыз оқушылар ғана емес, олардың ата-аналары үшін де жан жадыратар жомарттық ақ түйенің қарны жарылғанмен бірдей айтулы оқиға болды. Өйткені, боран-шашыны көп, қырау қабақты қыста жас балаларды ондаған шақырым жерге тасымалдап оқыту оңай-оспақ шаруа емес. Бұрынғы көнетоз автобус әбден тозығы жеткен, жүргеннен тұрғаны көп көлік болатын. Автобус жаңартуға қаражат та табылмай келді. Енді міне ел болашағын ойлаған іскер жандар жас толқынға жанашырлық жасап отыр.
–Ауылдың 11 оқушысы қатынап оқушы еді, – дейді Карамышев ауылдық округінің әкімі Сәуле Дәниева, – Мат ауылынан Шұбарағаш орта мектебіне алты оқушы, Суворовка ауылынан Новобратск орта мектебіне бес оқушы тасымалданатын. Кәсіпкерлердің қолдауымен Шұбарағаш орта мектебіне сыйланған жаңа «Газель» оқушылардың сабақтан қалмауына, қауіп-қатерсіз болуына септігін тигізбек.
Мектеп директоры Иван Рыблердің айтуына қарағанда, жергілікті жұртшылық жанашыр жандардың қамқорлығына дән разы. Сөз арасында аудандағы 18 елді мекеннен жалпы білім беретін мектептерге 223 оқушының тасымалданатынын айта кетелік.
