Аймақтар • 11 Наурыз, 2021

Цифрлы трансформация: Пойыздар қозғалысын басқару орталығы ашылды

18 рет көрсетілді

Ақтөбе қаласында ашылған пойыздар қозғалысын басқару орталығы өткен жылдың желтоқсан айынан бері кідіріссіз жұмыс істеп, Атырау, Батыс Қазақстан, Маңғыстау, Қызылорда облыстары аумағынан өтетін пойыздардың қозғалысын реттеп отыр. Бұл – «Қазақстан темір жолы» ҰК» АҚ-тың цифр­лы трансформация бағыты бойынша елімізде іске асырып отырған тұңғыш қанатқақты жобасы. «Қазақстан темір жолы» ҰК» АҚ корпоративті даму және HR жөніндегі басқарма төрағасының орынбасары Серік Әбденов Ақтөбеге келген сапарында пойыздар қозғалысын басқару орталығында болып, Орал, Атырау, Маңғыстау және Қызылорда қалаларынан осы орталыққа ауысып келген қызметкерлердің жағдайымен танысты.

«Елбасы Нұрсұлтан Назарбаевтың бизнесті трансформациялау бастамасымен қолға алынған еліміздегі ірі қанат­қақты жобалардың бірі – пойыздар қоз­ғалысын басқаруды цифрландыру мен автоматтандыру әлемдегі ең озық 300 жобаның арасынан іріктеліп алынды. Мақсат – магистральды желілерді заманауи талшықты-оптикалық байланыс­пен қамтып, қашықтықта орналасқан темір жол бекеттерін басқарудың бірың­ғай диспетчерлік орталығын құру. Жо­ба батыс аймағының бес бөлімшесі – Ақтөбе, Атырау, Маңғыстау, Орал және Қызылорданың диспетчерлік ор­­та­лық­тарын біріктіру мақсатында өткен жылдың қыркүйегінен бастап қол­­ға алынды. Сол кезден бастап төрт өңір­­дің тәжірибелі 186 диспетчері Ақ­төбеге қоныс аударды. Пойыздар қоз­ғалысын цифрландыру жобасының іске қосылғанына үш ай уақыт өткеніне қа­рамастан, бүгінде өз нәтижесін бере бас­тады», дейді С.Әбденов.

Осыған дейін «Қазақстан темір жолы» ҰК» АҚ-қа қарасты әрбір темір ­жол бөлімшесінің диспетчерлері пойыз­дардың жүру қозғалыстарын телефон­мен басқарып отыратын. Мәселен, те­мір ­жол бөлімшесінің диспетчері бекет диспет­черінен хабарлама алғаннан кейін ғана пойыздың қай жолдан өтетінін бел­гілеп, бағдаршамдарды қосуға шешім қа­был­дайтын. Диспетчерлік орталықтар бірік­тірілгеннен пойыз қозғалысы мен бағытын телефонмен хабарлау жүйесі жойылып, бес облыс аумағынан өтетін пойыздар қозғалысы бірден Ақтөбедегі ор­­талыққа түсіп, белгілі бір учаскеге жа­уап­ты диспетчердің бақылауында болады.

Пойыздар қозғалысын басқару орта­лығына Атырау, Маңғыстау, Қызылорда, Батыс Қазақстан облыстарынан ауысып келген 186 диспетчердің басым бөлігі – жас отбасылар. Көшіп келгендер әлеу­меттік пакетпен қамтамасыз етілген. Тара­тып айтқанда, оларға өткен жылдың соңында 45 айлық есептік көрсеткіш мөлшерінде бір реттік өтемақы берілді, пәтерлерінің жалдау ақысын екі жыл бойы компания төлейді, отбасы мүше­лерінің жұмысқа, балаларының мектеп пен балабақшаға орналасуына жәр­демдескен. Енді Ақтөбеге қоныс аудар­ған қызметкерлер компания басшы­лы­ғына пәтердің жалдау құнына бөліне­тін қаражатты ипотеканың бастапқы пайыз­дық жарнасы түрінде аударуды ұсыныс етіп отыр. Өйткені көптеген жас маман Ақтөбеден баспана сатып алып, тұрақтап қалуды жоспарлаған.

С.Әбденов диспетчерлік орталық­тардың біріктірілуінен соң оңтайландыру жұмыстары басталып кеткенін де жасырмады: «Бұрын бес облыста пойыздар қозғалысын 300 диспетчер реттеп отыратын. Қазір 186 қызметкер Ақтөбеге қоныс аударды, 19 адам жасына байланысты зейнеткерлікке шықты. Біріктірілген бекеттердегі 5 қызметкер темір жолдың басқа бөліктеріне жұмысқа ауыстырылса, кейбіреулері кәсіби білік­тіліктерін көтеру курстарына оқуға жіберілді».

Пойыздар қозғалысын басқару орта­лы­ғының диспетчері Арайлым Мұқы­шева Орал қаласындағы темір жол бө­лім­шесінде диспетчер болып жұмыс істеген. Ол өткен жылдың соңында Ақ­­төбеге қоныс аударған. 12 темір жол бе­кеті мен 7 разъезд бойындағы пойыз­дар қозғалысына жауапты маман Ресей Феде­рациясы шекарасындағы «Озинки-Қазақ­стан» бекеттері арасында әрлі-берлі өтетін жүк пойыздарының қозғалысын ба­қылайды. Нақтырақ айт­қанда, Илецк темір жол бекетінен жүк пойыз­дарын қабылдап алып, Озинки бекетінде тап­сырады. Оның ар жағында  – Ресей Феде­рациясының Саратов қаласы.

«Теміржолдың Батыс Қазақстан облысындағы бөлімшесінен 13 диспет­чер ауысып келдік. Менің отбасым да өзіммен бірге келді. Ақтөбеде пә­тер жалдап тұрамыз, балаларым мек­теп пен балабақшаға орналасты. Пәтер­ақымызды компания төлеп отыр. Бұрын да Оралдағы темір жол бөлімшесінде «Озинки-Қазақстан» аумағындағы жүк пойыздарының қозғалысына жауапты болатынмын. Бақылауымдағы осы темір жол бөлігінің ұзындығы 248 ша­қырымды құрайды», деді А.Мұқы­ше­ва. Ол қызметкерлердің пәтер жал­дау ақысына беретін компания қаржы­сының ипотекаға баспана сатып алу үшін банк­терге алғашқы кепілдік жарна түрінде аударылуын мақұлдайды. «Мамандардың жұмыс орнын ауыс­тыруы, басқа қалаға қоныс аударуы, пәтер алуы өте жақсы мүмкіндік және өмір­лік тәжірибе»,  дейді маман.

Қызылорда қаласында 10 жыл бойы пойыз диспетчері болып жұмыс істе­ген Мұхаммед-Ханафия Сиятов қазір «Қазалы-Сексеуіл» және «Сек­сеуіл-Қоскөл» бағытындағы пойыз­дар қозғалысын бақылайды. Осы бірік­тірілген темір жол бөлігінің жалпы ұзын­дығы 456 шақырымға тең. «Қазалы-Сексеуіл» бағыты – екі жо­­лақты, ұзындығы 180 шақырым, қозғалыс автоматтандырылған жүйеде басқарылады. Ал «Қоскөл-Сексеуіл» бағыты бір жолақты, осы жол учаскесінің ұзындығы – 246 шақырым. «Ол жақтан Қарағандыға қарай пойыз тапсырамыз. Қазір күніне Шалқар темір жол бекеті бағытына 15-17 пойыз өткізіп, Қарағандыдан 6-7 пойыз қабылдаймыз. Бұл бұрын екі учаске еді, қазір бір учас­кеге біріктірілді. Жолаушылар және жүк пойыздарының кідіріссіз өтуін бақылап, жолдарды ашып-жауып, бағдаршамдарды қосып отырамыз. Сонымен қатар осы учас­кеден өтетін жүк және жолаушылар по­йыздарынан өзге резервтегі тепловоздар қозғалысын да бақылаймыз. Мұнымен бірге диспетчерлер рельс бойында жұ­мыс істеп жатқан теміржолшылардың қауіпсіздігіне де жауапты болады. Ақтө­беге өткен жылдың соңында Қызыл­ордадан әйелім және үш баламмен бірге кө­шіп келдім. Балаларды балабақшаға ор­наластырдық. Енді төртінші сәбиімізді күтіп отырмыз. Бұйырса ол ақтөбелік болады. «ҚТЖ» ҰК» АҚ басшылығы пәтерақымызды төлеп отыр. Көшіп келгенде жүк тасымалының шығындарын көтерді, 131мың теңге көлемінде бір реттік өтемақы алдық, дейді М.Сиятов.

«ҚТЖ Жүк тасымалы» ЖШС Бас директорының маркетинг және жос­парлау жөніндегі орынбасары Владимир Петровтың айтуынша, пойыздар қозға­лысын басқару орталығы ашылғалы ком­панияның басы артық шығындары қысқарып, 17 млрд теңге қаржы үнем­делген. Соның ішінде диспетчерлік орта­лықтарды ұстап тұру және локомотив пар­кінің шығындары азайған.

Пойыздар қозғалысын басқару ор­талығының негізгі байланыс каналдары мен цифрландыру жүйесін «ҚТЖ» ҰК» АҚ мамандары жасақтаған. Енді осындай орталықты еліміздің бас­қа өңірлерінде ашу жоспарда тұр. Осы жылдың соңына дейін Алматы қаласында оңтүстік-шығыс бағыт бойынша пойыздар қозғалысын басқару орталығы ашылады деп күтілуде. 2022 жылы орталық-солтүстік бағыт бойынша басқару орталығы Нұр-Сұлтан қаласында, не Көкшетау қаласында ашылады деп жоспарланған.

 

Ақтөбе облысы

 

Соңғы жаңалықтар

Шығыс «Қызыл» аймақта

Аймақтар • Кеше

Цифрлы теңге жобасы талқыланды

Экономика • 23 Шілде, 2021

Ақпараттық хабарлама

Егемен Қазақстан • 23 Шілде, 2021

Қазақстанда вакцинаның қанша қоры бар?

Коронавирус • 23 Шілде, 2021

Ұқсас жаңалықтар