Саясат • 16 Наурыз, 2021

Мемлекеттік қызметшілердің мінез-құлқына көзқарасыңыз қандай?

27 рет көрсетілді

Қазақстанның Мемлекеттік қызмет істері агенттігі «Қоғамдық пікір» зерттеу институты мен еліміздегі Біріккен Ұлттар Ұйымының Даму бағдарламасы (БҰҰДБ) 2020 жылы жүргізген мемлекеттік қызметшілердің әдеп деңгейін бағалау жөніндегі әлеуметтік зерттеудің нәтижелерін ұсынды.

Зерттеу Қазақстандағы мемлекеттік қызмет туралы қолданыстағы заңнамаға жаңа ережелер енгізілгеннен кейін мем­лекеттік қызметшілердің әдеп нормаларын сақтау деңгейін талдауға бағытталды. Сауалнамаға барлығы 7000 респондент, оның ішінде мемлекеттік қызметшілер, кәсіпкерлер, заңды тұлғалар, сондай-ақ тәуелсіз сарапшылар қатысты.

«БҰҰ Даму бағдарламасымен ынты­мақ­тастық – агенттік қызметінің маңызды құрамдас бөлігі. БҰҰДБ қолдауымен мемлекеттік аппаратты кәсібилендіруге байланысты көптеген жобалар жүзеге асырылды, бұл агенттіктің әлеуетін нығайтуға, Қазақстандағы мемлекеттік қызмет жүйесін дамытуға және мем­лекеттік қызметтердің сапасын жақ­сартуға оң әсер етуде. Осы сауалнама агенттікке мемлекеттік аппарат этикасын жақсарту бойынша одан әрі шаралар әзірлеуде айтарлықтай көмек көр­сетеді деп ойлаймыз. Сондай-ақ, бұл кездесу агенттік пен БҰҰДБ арасындағы мемлекеттік қызмет саласындағы ынты­мақтастықты нығайтудағы тағы бір қадам болады деп үміттенеміз», деді Мемлекеттік қызмет істері агенттігі Стратегиялық даму және халықаралық бағдарламалар департаментінің директоры Азамат Жолманов.

«БҰҰДБ Мемлекеттік қызмет істері агент­­­тігімен ұзақ мерзімді серіктес­тікті жоғары бағалайды, оның аясында бір­қатар сәтті жобалар мен маңызды баста­малар жү­зеге асырылды. Біз мемле­кет­тік қызметтегі этика мен адал­дық қағи­даттарының орындалуына қолдау көр­сететін боламыз», деді Қазақ­стан­дағы БҰҰДБ-ның тиімді басқару департаментінің директоры Константин Сокульский зерттеу нәтижелерін таныс­ты­руға арналған іс-шарада.

Сауалнама нәтижелері бойынша рес­пон­денттердің үштен бірі (37,5 пайызы) мемлекеттік қызметшілердің жар­тысынан көбі Әдеп кодексі талаптарын сақтайды деп санайды. 34,9%-ы мем­лекеттік қызметшілердің мінез-құлық әдебіне қатысты жағдай жақсарып келеді деп санайды; 31%-ы жағдайдың әрдайым жақсы болып қалатынына сенімді.

2020 жылдың нәтижелерін 2017, 2018 жылдардағы нәтижелермен салыстырсақ, айтарлықтай өзгерістерді көруге болады, яғни мемлекеттік қызметшілерге қатысты әдепке сай емес мінез-құлқына байланысты шаралар қабылдауға мәж­бүр болған респонденттердің пайызы айтарлықтай төмендеді. Мысалы, егер 2018 жылы 34,7% респондент мемле­кеттік қызметшінің әдепке жат мінез-құл­қына қатысты шаралар қабылдауға тура келді деп жауап берсе, 2020 жылы мұн­дай респонденттер үлесі 13,4% болды.

Респонденттердің басым көпшілігі (92,8%) карантин кезінде мемлекеттік қызметшілермен әрекетке түсу барысында әдепке қатысты қандай да бір проблеманы байқамаған. Тек 10 респондент (0,4%) карантин кезінде әдепке байла­ныс­­ты бұзушылықтарды байқағанын айтты.

Сауалнамаға сәйкес, сұралған мем­лекеттік қызметшілердің 85,7%-ы Әдеп жөніндегі кеңестің және оның шешім­дерімен істерді қарау рәсімдерінің әділ­дігіне сенеді. 2017, 2018 жылдардың нәти­желерімен салыстырғанда мемлекеттік қызметшінің әдебін сақтауға жауапты органдар мен институттар рәсімдерінің әділдігіне деген сенімнің өскенін көруге болады. 2020 жылы Әдеп кодексінің маз­­мұнымен танысқан мемлекеттік қыз­метшілердің саны өсті.

Бұдан басқа, 2021 жылы агенттік алғаш рет Әдеп жөніндегі уәкілге әдеп­тілік дең­гейін айқындау үшін әрбір мем­лекеттік органның ресми сайтында сауалнама орналастыруды ұсынды, оған барлық азаматтар қатыса алады. Осы­лайша, әрбір азамат сауалнамаға қаты­суына болады.

Мемлекеттік қызметшілердің әдеп деңгейінің және Әдеп жөніндегі уәкілдер қызметінің рейтингтері мына сілтемеде қолжетімді: https://www.gov.kz/memleket/entities/qyzmet?lang=ru

Сауалнама БҰҰДБ мен Мемлекеттік қызмет істері агенттігінің «Мемлекеттік ап­па­ратты кәсібилендіру тетіктерін же­­тіл­­діру, мемлекеттік қызметтердің сапа­­сын қамтамасыз ету және сыбайлас жем­­қор­лықтың алдын алу» бірлескен жо­басы шеңберінде жүргізілді.

 

 

Соңғы жаңалықтар

Ырыздық кемімесін десек...

Қазақстан • Бүгін, 00:27

Мүсіншілер мұңы

Өнер • Бүгін, 00:16

Ер Тоқтар

Таным • Кеше

Словакия QazVaс-ты мойындай ма?

Коронавирус • Кеше

Ұқсас жаңалықтар