Тәуелсіздікті мойнына тұмар қылып таққан қазақ баласының қиялына қанат бітірген, қадамына құт дарытқан бір құдірет болса, ол – баһадүр бабаларымыздың даңқты жолы. Сол жолмен қайта жүру мүмкін болмаса да, дәуір бет-бейнесін заман ыңғайына сүйеніп, әркім әртүрлі ой кеңістігінде бейнелейді. Мұндағы «Ғасырлар үні» картинасы біздің сол пікірімізді үстеп тұрғандай. Авторы – Суретшілер одағының мүшесі, Қазақ КСР-інің Ш.Уәлиханов атындағы Мемлекеттік сыйлықтың лауреаты Бәтима Зәуірбекова. Суретші оқырманға дәуір дауысын жеткізуге оқталған.
Оның қолынан қазақстандық, шетелдік музейлер мен жеке коллекцияларда сақтаулы тұрған гобелен, кескіндеме және графикалық (портрет, пейзаж, натюрморт, абстрактілі композициялар) жанрдағы 300-ден астам туынды шықты. Бұлардың бәрі ұлтымыздың руханиятына құйылған жауһар жәдігерлер. Біз осы ретте оқырман назарына тарихқа астар болған тамаша туындысын ұсынып отырмыз.
Қылқалам шебері «Ғасырлар үні» шығармасында қола дәуіріндегі атақты тамғалы петроглифтеріндегі көне бейнелер символын ұтымды пайдаланған. Мұнда Қазақстан аумағын мекен еткен халықтармен байланыс анық байқалады. Біз кенеп бетінде түстер мен пішіндердің ойнатылуынан туған әйел, Күнбасты құдай, балбалдардың пішіндері арқылы ежелгі дәуірдің дауысын естиміз.
Туынды ара-арасында ырғақты әшекейге ауысатын жоғарыдан төмен түскен сәуледей сызықтардың майлы бояу гаммасымен орындалған. Картинаның кеңістігі түстік нәзік градациялармен ауыстырылады. Фондық тік сызықтар композициядағы басты бейнелердің нобайын жасауда ерекше рөл атқарып тұр.
Картина символизм стилінде жазылған. Суретші жасырын үндеуді, аллегорияны, тіпті терең философиялық немесе мистикалық мәнді шифрларды қолданған. Олар көрерменді терең ойлануға, сюжетті жеңіл қабылдаудан бас тартып және автор ойының нағыз түйінін табуға итермелейді.
Қазақ халқының мәдени бұлақтарынан сусындаған Б.Зәуірбекованың шығармашылығы біздің халқымыздың әсем дүниетанымымен таныстырып, ұлттық сана-сезімді сақтауға көмектеседі.
