Шалғай ауылдардағы көптен қордаланып қалған маңызды мәселенің бірі – мүмкіндігі шектеулі адамдарға, оның ішінде жастарға кәсіби бағдар беру. Кей-кейде он екі мүшесі сау адамдар да екі қолға бір күрек таба алмайтыны бар. Ел ішіндегі мүмкіндігі шектеулі жастар арасында белгілі бір мамандық алсақ, тәп-тәуір табысы бар жұмыс істесек деп алға ұмтылатындар аз емес. Оның үстіне кәсіби жағынан даярлайтын оқу орындары да жоқ. Бұл жобаның басты мақсаты – олардың әлеуметтік-тұрмыстық жағдайын жақсарту. Ол үшін жастарға қолынан келер кәсіптің қыр-сырын меңгертіп, тағдырдың салған ісіне мойымай, өзін-өзі шыңдай дамытуға жол ашу. Елмен араласып, тырбанып тіршілік істесе, кірпіш дүниенің кетігіне жарағандарын да қуаныш көріп, көңілдерін демдейді әрі өмірге бейімделеді.
Жоба аясында «Батыр» қоғамдық бірлестігінің «Тұлғаны дамыту орталығы» базасы тұрақты түрде мүмкіндігі шектеулі адамдарды белгілі бір кәсіпке даярлап, кейін жұмысқа орналастырмақ. Орталық қажетті тігін машинасы, компьютер тәрізді құралдармен жабдықталған. Қолы епсекті адамдардың айы оңынан тумақ. Айталық, тігін ісі, шаштараз, дәстүрлі халықтық қолөнер, ағаш, тері өңдеу, компьютерлік сауаттылық бағытында бастапқы білімін жинақтап, тәжірибелерін толықтыра алады. Арғы жағы өздеріне байланысты.
Жалпақ әлемді жаман індет иектеп, алқымыңнан алып тұрған уақытта мүмкіндігі шектеулі адамдардың да қатардан қалмай қарекет етуіне қамқорлық жасалуы адами тұрғыдан алғанда иманды шаруа екендігі сөзсіз. Ақмол ауылында басталған ақжарылқап бастаманың бағалы болатындығы да сондықтан.
Ақмола облысы,
Целиноград ауданы
