Осылайша, «ДАРА» ЖҚ Samruk-Kazyna Trust Әлеуметтік жобаларды дамыту қорының қолдауымен іске асыратын «Әр алуан – бірақ тең» жобасы аясында Қордай кентіндегі түзету кабинетінің филиалдары Жамбыл облысының Масаншы және Сортөбе ауылдарында ашылды. Ал Қордай ауданының өзінде Ресурстық орталық өз жұмысын бастады. Бұдан басқа, 15 жылдан бері жұмыс істеп келе жатқан Қордай түзету кабинетінде жөндеу жұмыстары жүргізіліп, қажетті жабдықтармен толық жабдықталды. Бұл іс-шара Президент Қасым-Жомарт Тоқаевтың бастамасымен ұйымдастырылған «Игі істер марафоны» аясында өтті.
Жамбыл облысы білім басқармасының мәліметінше, Қордай ауданында ерекше білім алуға қажеттілігі бар 910 бала тұрады, оның ішінде 403-інде мүгедектік бар.
«Мамандардың уақтылы және білікті көмегі «ерекше» баланың өмірін жақсартып, оның лайықты және табысты болашаққа қадам басуына мүмкіндік береді. Білім алуында ерекше қажеттіліктерді талап ететін балалар мен олардың отбасыларына керекті қолдауды Қордай ауылындағы Психологиялық-педагогикалық түзету кабинеттері көрсетеді. Бүгін Масаншы мен Сортөбе балаларына өз ауылдарынан шықпай-ақ көмек алуға мүмкіндік беретін тағы екі филиал ашылды. Осы жұмыс істеп тұрған аудандық Психологиялық-педагогикалық түзету кабинеттері дамыту жобасы ауылдық жерлерде тұратын ерекше білім беру қажеттілігі бар балаларға қызмет көрсету спектрін ілгерілету және кеңейту үшін үлгі бола алады», деп атап өтті «ДАРА» қорының өкілі Сәуле Бексұлтанова.
Психологиялық-педагогикалық түзету кабинеті – бұл кез келген ерекше бала және оның отбасы дефектолог, психолог, логопед, сурдопедагог, тифлопедагог, ЕДШ нұсқаушысы, музыкалық ырғақ педагогі сияқты мамандар командасының кешенді білікті көмегін ала алатын мекеме. Жыл сайын Психологиялық-педагогикалық түзету кабинеттері, филиалдарды қоса алғанда, дамуында түрлі ауытқулары бар 120-дан астам балаға тегін қызмет көрсете алады.
«Психологиялық-педагогикалық түзету кабинеттері және басқа да арнайы білім беру ұйымының желісін кеңейтудің нәтижесінде ерекше білім беру қажеттіліктері бар балалар өз құрдастарымен бірге жалпы білім беретін мектепте оқи алады. «Самұрық-Қазына» АҚ компаниялар тобының қолдауымен бүкіл Қазақстан бойынша 15 түзету кабинеті және 16 ресурстық орталық ашылды», дейді Қордай аудандық пошта байланысы торабының бастығы Ақжол Кәрімов.
Ресурстық орталық – бұл ерекше балалармен жұмыс істейтін мамандар мен қарапайым мұғалімдердің мектеп кеңістігі және ынтымақтастық аймағы. Ресурстық орталықтың қолдауымен мектепте оқуда ерекше білім беру қажеттіліктері бар балаларды жалпы білім беретін мектептерге толық және тиімді енгізу, дамуында ауытқулары бар балалармен жұмыс істейтін педагогтерге және олардың ата-аналарына ғылыми-әдістемелік қызметтер кешенін көрсету үшін қажетті жағдайлар жасалады.
