Бүгінгі таңда Ұлыбританияда 18 миллионнан астам адам осы екпені салдырып үлгерген. Бұл хабар Еуропаның бірнеше елі мен Канада тромбоз қаупінен қорқып, вакцинаны белгілі жас топтары үшін тоқтату туралы шешіммен қатар келіп отыр. Дәрілік заттар мен медициналық бұйымдарды реттеу жөніндегі британдық агенттік (MHRA) бұл адамдардың өлімі вакцинамен байланысты ма, жоқ па, әлде бұл жай ғана кездейсоқтық па екендігі белгісіз екенін айтқан. Сондай-ақ агенттіктің атқарушы директоры Джун Рейн вакцинаның COVID-19 індеті мен оның асқынуларының алдын алудағы пайдасы кез келген қауіптен асып түсетінін мәлімдеді. Ол шақырту алған азаматтар ешнәрсеге қарамастан, келіп екпе алуы керек деген пікір білдірген.
AstraZeneca вакцинасын алғандардың арасында қанның ұюы пайда болғаны туралы хабарламалардан кейін кейбір елдердің реттеуші органдары екпеге немесе адамдар жасына түрлі шектеулер енгізе бастады. Мәселен, Нидерланды әйелдер арасында тромбоз пайда болған жаңа бес жағдайдан кейін 60 жасқа дейінгі адамдарды бұл препаратпен вакциналауды тоқтатқан. Олардың біреуі қайтыс болды. Германия да дәл осындай шешімді аптаның басында қабылдап үлгерген. Канада да 55 жасқа дейінгі адамдарға вакцинаны қолдануды шектеп отыр.
Ұлыбританияда 31 миллионнан астам адам AstraZeneca мен BioNTech-Pfizer вакцинасының алғашқы дозасын алған. Нәтижесінде, елдегі вирус жұқтырғандардың саны күрт төмендеп, індеттен қайтыс болғандардың үлесі азайған.
