Өзін ғана емес, айналасындағылар мен жақынын ойлаған Түркістан облысының 21 мыңнан астам азаматы екпе қабылдады. Олардың басым бөлігі, яғни 14 мыңға жуығы медицина қызметкері, 5 мыңнан астамы мұғалім болса, мыңға жуығы құқық қорғау органдары және жарты мыңдай әртүрлі топтағы азаматтар. Бұл айда екпе салдыруға ниет білдіргендердің саны артып отыр. Облыстық қоғамдық денсаулық басқармасының хабарлауынша, екпе қабылдағандар дәрігерлердің бақылауында. Ал екінші компонентпен 10 мыңға жуық азамат вакцина алыпты. Инфекцияға қарсы вакциналау жұмыстары 65 емдеу мекемесінде жүргізілуде. Соңғы тәулікте Түркістан облысында 19 адамда COVID-19 індеті анықталған. Жалпы облыста пандемия белең алғалы 600 мыңға жуық ПТР-сынамалары алынған. Соңғы тәулікте зертханаларда 3 мыңдай адам тексерілген. Жұқпалы аурулар ауруханасында барлығы 610 орын бар.
Жыл басынан бері коронавирус инфекциясының расталған 800-ден астам жағдайы тіркелді. Жалпы облыста коронавирусты инфекциядан 4500-ден астам жағдай расталып, жыл басынан бері 625 пневмония аурушаңдығы тіркелген. Соңғы екі аптада коронавирус – 36%, пневмония 54%-ға өскен. «Өзге облыстардағы жағдайдың күрделенуіне байланысты коронавирус және пневмония жұқпалы ауруларына шалдығудан барынша сақтанған жөн. Ал сақтанудың бірден-бір жолы – вакцина қабылдау. Тұрғындар арасында отбасылық, мерекелік іс-шараларды ұйымдастыру толастамай тұр. 2021 жылдың қаңтар айынан бастап, тыйым салынған 192 мерекелік іс-шара ұйымдастырылғаны белгілі болды», дейді облыстың бас мемлекеттік санитарлық дәрігері Нұрбек Нышанов.
Аймақта бүгінде жалпы 23 мыңнан аса медицина қызметкері бар. Оның 5 мыңнан астамы – дәрігер, қалғандары орта буын мамандары. Ақ халатты жандардың ерен еңбегінің арқасында өңірде қауіпті індетті жұқтырған 4500-ге жуық науқас толық жазылып шықты. Айта кетелік, дәрігерлер індетпен күресумен қатар басқа да ауруларды емдеуді назарынан тыс қалдырған жоқ. Мысалы, жуырда облыстық клиникалық ауруханасының дәрігерлері ауыр халде жеткізілген 23 жастағы жүкті әйелге бір мезетте екі ота жасады. Ана мен нәрестенің өмірін аман алып қалу үшін алдымен оны кесарь тілігімен босандырып алған. Кейін сол жақ бауырын құрттан лапаротомия әдісі арқылы тазалаған. «Ота шұғыл диагностикалық, лабораториялық және салалық дәрігерлердің тексеруінен соң жасалынды. Эхинококты кистасы жарылу қаупінен ана мен бала өмірі қыл үстінде тұрған. Қазір сәби мен ананың өміріне қауіп төніп тұрған жоқ», дейді хирургия бөлімінің меңгерушісі Мақсұт Аймағанбетов. Ал №3 облыстық перинаталдық орталығының дәрігерлері небәрі 1,5 кило салмақпен туылған үшемді 40 күн бойы күтіп, жетілдіріп барып, перзентханадан шығарды. Дәрігерлердің айтуынша, жүктіліктің 32-ші аптасында әйелге жедел ота жасауға тура келген. Алғаш рет ана атанған Динара Мухитованың жақындары сәбилерге Хадиша, Фатима, Захра есімдерін берген. Дәрігерлер аман алып қалған үш қыз мерзімінен бұрын дүниеге келіп, бір апта бойы жансақтау бөлімінде жатқан. Өкпесі дұрыс дамымай туылған нәрестелердің үшеуі бірдей жасанды тыныс алу аппаратына қосылған. Дәрігерлердің қатаң бақылауында болған нәрестелердің әрқайсысы осы уақыт ішінде бір килодан салмақ қосқан. Жас отбасы Кентау қаласына қарасты Қарашық ауылының тұрғындары. Айта кетелік, облыстық перинаталдық орталығында жыл басынан бері 2 652 нәресте дүниеге келген.
Түркістан облысы