Елімізде тұңғыш рет өткізіліп жатқан жобаның негізі мақсаты – өңір-өңірдегі суретшілер мен ақындардың шығармаларын насихаттау һәм таныту, олардың туындылары арқылы Қарағанды облысының тарихи тұлғаларын, мәдени ескерткіштерін, сакралды орындарын, табиғатын, тәуелсіздік кезеңінде өлшеусіз үлес қосқан тұлғалардың есімін асқақтату, поэзия мен сурет өнерінің үндестігін бағалау әрі бағамдау, оқырман қауымның модерндік ортасын қалыптастыру болып отыр. Қазақ және орыс тілінде өтетін өнер сайысына қатысушы ақындар мен суретшілердің жас ерекшелігіне шектеу қойылмайды. Кез келген дарынды үміткер бұрын жарияланбаған шығармасын «Мәдениет порталына» тіркеу арқылы қатыса алады.
«Тәуелсіздік: Сөз бен Сурет» атты ақындар мен суретшілер арасындағы республикалық онлайн-байқауы аясында жеңімпаз ақындардың өлеңдері қазақ, орыс және ағылшын тілдеріне аударылып, суретшілердің картиналарымен бірге арнайы альбом дайындалмақ. Сондай-ақ жүлдегерлердің шығармаларынан құралған альбом ағылшын және орыс тілді мемлекеттердің ұлттық кітапханаларына жолданады. Мұнымен қоса альбом арнайы түсірілген бейнероликтерге сілтеме берілген QR-кодтармен жарық көрмек.
