Нұрсұлтан Назарбаев қоры ұйымдастырған онлайн-конференцияға қазақстандық және халықаралық танымал спикерлер, коммерциялық емес ұйымдардың (КЕҰ) өкілдері, мемлекет және қоғам қайраткерлері, кәсіпкерлер мен меценаттар, әйгілі бренд-көшбасшылар және БАҚ өкілдері қатысып жатыр.
Іс-шараны өткізуге Азаматтық бастамаларды қолдау орталығы КЕҰ аймақтық қолдау көрсетті. Ал форумның бас серіктесі – Eurasian Resources Group.
Нұрсұлтан Назарбаев қоры аталған іс-шара арқылы қоғамдық маңызы бар өзекті мәселелерді талқылау мақсатында әртүрлі бағыттағы ұйымдарды біріктіруге, мемлекет пен КЕҰ ынтымақтастығын нығайтуға ықпал етуді мақсат тұтады.
Форумның бірінші күнінде Нұрсұлтан Назарбаев қорының директоры Дариға Назарбаева, БҰҰ Даму бағдарламасының Қазақстандағы Тұрақты өкілі Якуп Бериш, Мохаммед Бин Рашид әл-Мактума білім қорының басқарма төрағасы Джамал Бин Хувайреб, Eurasian Resources Group (ERG) Директорлар кеңесінің төрағасы Александр Машкевич және басқа спикерлер қатысты.
Форум сессиялары аясында мемлекеттік органдар мен басқа да ұйымдардың экономика, әлеуметтік қорғау, денсаулық сақтау, білім беру салаларында өзара іс-әрекеттердің маңызды бағыттары талқыланды. Жыл сайынғы Әлеуметтік идеялар мен жобалар жәрмеңкесі аясында КЕҰ ұсынатын көптеген жобаны талқылауға ерекше назар аударылды. Сондай жәрмеңкелердің бірі осы жылы Алматы қаласында 14-15 сәуірде өткізілді. Бірінші Әлеуметтік жобалар форумы Әлеуметтік идеялар мен жобалар жәрмеңкесінің жалғасы ретінде ұйымдастырылып отыр.
Форум спикерлері Әлеуметтік идеялар мен жобалар жәрмеңкесі сияқты алаңдардың маңыздылығы туралы айта келе, мұндай алаңдарда белсенді қазақстандықтардың бастамалары нақты қолдауға ие болатынын жеткізді.
Форумды кіріспе сөзімен ашқан Дариға Назарбаева: «Форум ел Тәуелсіздігінің 30 жылдығы мерейтойы аясында өтіп жатыр. Тәуелсіздік жылдары Қазақстанда тұрақты әрі қарқынды дамып жатқан үкіметтік емес ұйымдардың жүйесі қалыптасты. Қоғамды демократияландыру бағдарламасы ҮЕҰ жүйесін дамытуға айтарлықтай серпін берді. Мұны еліміздің Тұңғыш Президенті 1998 жылғы Қазақстан халқына Жолдауында айтқан болатын. Елбасы азаматтық қоғам құруда ҮЕҰ рөлін күшейту – тәуелсіз Қазақстанның демократиялануы мен дамуының басты элементі екенін атаған. Сірә, Қазақстанның үшінші секторының қызметі үнемі зерттеуді қажет етсе керек. Бұл үшін жүйелеу, жан-жақты насихаттау мен озық тәжірибені қолдану қажет. Әлеуметтік жобалар форумы өзара тығыз қарым-қатынас жасаудың тұрақты алаңы бола алады. Бүгінгі форум Нұрсұлтан Назарбаев қорының әлеуметтік идеялар мен жобалар жәрмеңкесінің жалғасы іспетті. Қор бұл шараны Елбасының бастамасымен 2008 жылдан бері өткізіп келеді. Содан бері жәрмеңкеге 15000-нан астам түрлі ұйым қатысқан. 303 жоба қордың қолдауына ие болып, грант иеленді», деді.
Расында да, 2008 жылдан бері өткізіліп келе жатқан жәрмеңкенің әр жылы жаңа жобаларды жүзеге асырумен қатар келеді. Мысалы, «Другая жизнь» қоғамдық қоры жәрмеңкеде жеңіске жетіп Талдықорған қаласында аутист балаларға арналған сенсорлық көмек кабинетін ашты. Ал «Ангел» қоғамдық бірлестігі «Пакетам нет!» экологиялық акциясын ұйымдастырып, қоршаған ортаны полиэтилен қапшықтармен ластау мәселесін шешуге Атбасар ауданындағы 12 000-нан астам тұрғынның атсалысуына мүмкіндік берді.
Қор директорының айтуынша, биыл ұсынылған жобалардың саны рекордтық деңгейге жеткен – 221. Өтініштердің көбі Алматы қаласынан (35), Алматы (30), Қостанай (18), Павлодар (17) және Шығыс Қазақстан (16) облыстарынан келген. «221 жобаның ішінен ең маңызды деген 50 жобаны таңдап алған байқау комиссиясының жұмысы оңай болған жоқ. Жобаларды таңдағанда, олардың маңыздылығы, тұрақтылығы, әлеуметтік әсері, жаңашылдығы және ақпараттық жағынан ашықтығы ескерілді», деді Дариға Назарбаева.
23 сәуір, Әлеуметтік жобалар форумының екінші күнінде Нұрсұлтан Назарбаев қорының гранты кімге берілетіні мәлім болады. Ал форум спикерлері мемлекет пен КЕҰ ынтымақтастығының тиімді мысалдарын келтіре отырып, осы тараптар арасындағы өзара іс-әрекетті әрі қарай да қалыптастыру керектігін атап өтті.
