Спорт • 23 Сәуір, 2021

Талапты қыз Тәліпова

224 рет
көрсетілді
4 мин
оқу үшін

Күні кеше ғана Польшаның Кельц қаласында бокстан жастар арасындағы әлем біріншілігі аяқталды. Бұл жарыста Қазақстанның былғары қолғап шеберлері табысты өнер көрсетіп, барша жанкүйерлердің алғысына бөленді.

Талапты қыз Тәліпова

Айтулы жарыста Қазақстан құрамасының қоржынына ал­ғашқы жүлдені салған Алматы облысының тумасы Елдана Тәлі­пова екені баршаға мәлім. Аса ауыр салмақ дәрежесінде күш сы­насқан қазақ қызы ширек финал­дық сайыста Украинаның өкілі Виктория Левчукті екінші раундта есінен тандырып, жартылай финалға жолдама алды. Бірақ бұл межеде Елдананың жолы бол­мады. Аса шиеленісті өткен бәсекеде ол Молдова боксшысы Дария Козорезге есе жіберіп, қола медальды қанағат тұтты. Десек те, Тәліпованың Польшадағы өнері мамандар тарапынан жоғары ба­ғаланды.

Кеше Елдана Тәліпованың алғаш­қы бапкері Дархан Қабылан­бе­ковпен жолығып, айтулы был­ғары қолғап шебері жайында біраз мағлұмат алдық. Дарханның өзі де кезінде осы спорт түрімен шұ­ғыл­данып, азды-көпті табыстарға қол жеткізген екен. Сонымен қа­тар кикбокс және қоян-қолтық ай­қас­тан да түрлі жарыстарда өнер көрсетіп, біраз жарыста қан­жығасы майланыпты. Қазіргі кезде Дархан өзінің досы, Қазақстан Республикасының еңбек сі­ңірген жаттықтырушысы Дастан Сәдуақасовпен «Дарын» промоу­терлік компаниясын құрып, отан­дық кәсіпқой боксты дамытуға барынша атсалысуда. Айтулы промоушеннің ұйымдастыруымен Жетісу өңірінде бірқатар дүбірлі доданың ұйымдастырылғанын жанкүйерлер жақсы біледі. 

–  Мен бірер жыл Алматы облы­сының Іле ауданында бапкер болып еңбек етіп, бокс өне­рі­не аңсары ауған жастарды жат­тық­тырдым. Солардың қатарын­да Елдана Тәліпова да бар. Мен оны «Қазциктегі» орта мек­тептің сегізінші сыныбында оқып жүрген кезінде байқадым. Өз құрбыларынан бойы едәуір ұзын қызға бірден назарым ауып, оған бокспен айналысу жайында ұсыныс айттым. Алдымен Елда­на­ның апасы Жұпар Омаровадан рұқсат сұрап, сол кісінің ақ батасын алдым. Содан жаттығу жұ­мыстарына кірісіп, шәкіртімнің ше­берлігін әбден шыңдадым. Нәти­жесі жаман болған жоқ. Елда­на өзі қатысқан жарыстардың бар­лығында жүлделі орындарды иеле­ніп, үнемі жеңіс тұғырына көте­рілді. Міне, енді жастар ара­сындағы әлем біріншілігінде қола медальды мойнына ілді. Мен шә­кіртіме дән ризамын. Алдағы уақытта Елдананың бағын­дыр­ған белестері бұдан да биік болаты­нына өз басым еш шүбә келтір­меймін, – деп Дархан Қабылан­беков ағынан жарылды.

Айтқандай-ақ Елдана Тәліпова қысқа ғана мерзім аралығында өз құрбыларының алды болды. Орта мектепте оқып жүрген кезінің өзінде бірқатар республикалық және халықаралық турнирде атой салды. Әлі есімізде, 2017 жы­лы 15 жастағы Елдана Швецияға са­пар шегіп, «Алтын қыздар» деп аталатын дүбірлі додада алтын­нан алқа тақты. Финалдық са­йыста ол ирландиялық Лорен Ла­йонды 90 секунд аралығында ұрып жыққаны жайында сол кезде барлық газеттер жарыса жазған еді. Содан кейін Украина, Ресей және тағы басқа мемлекеттерде жалауы желбіреген жарыстарда Тәліпова бас жүлдені олжалады.

Жасөспірімдер мен жастар буыны арасындағы Қазақстан біріншілігінде қарсылас шақ келтірмеген Елдана Тәліпова биыл Польшада өткен әлемдік до­да­да Қазақ елінің намысын қорға­ды. Жауапты жарыста ол жанкүйер­лер сеніміне селкеу түсірмей, елге қола медальмен оралды. Елда­наның ендігі мақсаты – Қазақ­станның қыздар құрамасы сапына еніп, байрақты бәсекелерде ел намысын абыройлы қорғау.

 

Соңғы жаңалықтар

Су үнемдейтін қондырғы

Технология • Кеше