Бокс • 25 Сәуір, 2021

«Губернатор кубогынан» олжалы оралды

14 рет көрсетілді

Ресейдің Санкт-Петербург қаласында бір аптаға жалғасқан бокстан «Губернатор кубогы» жолындағы жарыс мәресіне жетті.

Аталған турнирде бақ сынаған Қазақстан құрамасының былғары қолғап шеберлері екі алтын, екі күміс және үш қола медаль жеңіп алды.

Ел қоржынына алғашқы алтынды Олимпия ойындарында «қазақ­тың салмағы» атанып кеткен 69 килоға дейінгі салмақ дәрежесінде жұдырықтасқан Асланбек Шым­бергенов салды. Іріктеу кезеңдерінде қар­сыластарын айқын жеңген жерлесіміз жартылай финалда 2018 жылы Джакартада өткен Азия ойын­дарының финалында есе жі­берген өзбекстандық бокс­шы Бобо-Усмон Батуровпен кез­десті. Есе қай­таруды үш жыл күт­кен жер­лесіміз жекпе-жекте аянып қалған жоқ. Гонг үні естілгеннен бас­тап бі­рінші нөмірмен жұдырықтасқан Шым­­бергенов қарсыласын бұрыш-бұрышқа тықсырып, өзінің соққы­ларын діттеген жеріне дөп тигізіп жатты. Шабуылда да, қорғаныста да сауат­ты өнер көрсеткен Асланбек төре­шілердің бірауыз шешімімен жеңіске жетіп, өзбек боксшысынан Азия ойын­дарында кеткен есесін қайтарды.

Финалдық сайыста Асланбекті әйгілі ресейлік боксшы Андрей Зам­ковой күтіп тұрған еді. 2012 жыл­ғы Лондон Олимпиадасының жартылай финалында отандасымыз Серік Сәпиевтен жеңілген Замковой қазақ­стандық жанкүйерлерге жақсы таныс. 2018 жылдан бастап карьерасын қайта жалғастырған ол сол жылы Ресей біріншілігінде топ жарса, араға жыл салып өз елінде өткен әлем чемпионатында жасындай жарқылдады. Биыл 34 жасқа толатын ресейлік боксшы әлем бі­ріншілігінің жартылай финалында еліміздің бірінші нөмірлі боксшысы Абылайхан Жүсіповті 5:0 есебімен қапы қалдырған еді. «Губернатор кубогына» нағыз бабында келген Асланбек Шымбергенов финалда Ресей боксшысын өз еліндегі жарыс­та төрешілердің бірауыз шешімімен жеңіп, турнир жеңімпазы атанды.

Ел қоржынына екінші алтынды 81 килоға дейінгі салмақ дәрежесінде шаршы алаңға шыққан Бекзат Нұр­дәулетов салды. 2019 жылы Ре­сейдегі әлем чемпионатында алтын медаль олжалаған отандасымыз бұл жолы да Ресей төріндегі жарыста қарсылас шақ келтірмеді. Қазақстан чемпионы жартылай финалда әлем біріншілігінің финалында кездескен өзбекстандық Дилшодбек Рузметовті жеңсе, финалда шаршы алаң иесі – Имам Хатаевты нокдаунға түсіріп, қарсыласын өз жанкүйерлері алдында күмәнсіз жең­ді. Дегенмен ресейлік боксшымен өт­кен жекпе-жектің бі­рінші раундында отандасымыздың өзі де күтпеген жерде соққы өткізіп алып, нокдаунға түсіп қалған-тын. Бірақ қалған екі раундта Нұрдәулетов төрешілердің бұра тартуына жол бермеді.

Өкінішке қарай, 52 кило салмақта бақ сынаған былтырғы Қазақстан чемпионы, 2019 жылғы жастар ара­сындағы әлем чемпионатының қола жүлдегері, жас әрі дарынды боксшымыз Махмұд Сабырхан финалдық са­­йыс­та Рио Олимпиадасының чемпионы өзбекстандық Шохобиддин Зоировпен жұдырықтасты. Тең дәре­жеде өткен жекпе-жекте төрешілер жеңісті өзбек боксшысына берді. Финалда жеңілген Махмұд Сабырхан жарыстың күміс жүлдесіне ие болды. Сондай-ақ 75 ки­лодағы отандасымыз Әбілхан Аман­құл денсаулығына байланысты шешуші жекпе-жекке шыққан жоқ. Нәтижесінде, бұл салмақта жеңіс автоматты түрде ре­сейлік Глеб Бакшиге берілді. Со­ны­мен қатар бұл жарыста қазақ­стан­дық боксшылар үш қола жүлдені же­ңіп алды. Атап айтқанда, Даниял Сәбит (49 кг), Бекнұр Ожанов (60 кг) және Айбек Оралбай (91 кг) қоланы қанағат тұтты.

Осылайша, бокстан Қазақстан ерлер құрамасы «Губернатор кубогында» екі алтын, екі күміс және үш қола жүлдемен жалпыкомандалық есепте үшінші орын алды. Бірінші орын 18 медаль (4 алтын, 6 күміс, 8 қола) жеңіп алған Ресей боксшыларына бұйырса, екінші орынға 4 алтын, 1 күміс және 1 қола медаль иеленген Өзбекстан құрамасы жайғасты.

Соңғы жаңалықтар

Atmaca зымыраны сынақтан сәтті өтті

Технология • Бүгін, 18:35

Доллар қайтадан қымбаттады

Қаржы • Бүгін, 15:00

Ұқсас жаңалықтар