Аймақтар • 29 Сәуір, 2021

Қарағайдың өскіндері отырғызылады

40 рет көрсетілді

«Атадан мал қалғанша, тал қалсын» демеп пе еді қазақ?! Тал деге­нің ертең орманға айналады. Ал орман – та­биғаттың өкпесі іс­пет­ті. Ықылым заманнан бері көктем шыға Шы­ғыс Қазақстанда ағаш отырғызу дәстүрі үзілген емес. «Семей ор­­маны» резерваты фи­­лиалдарында да әдет­­тегідей орманды қал­­пына келтіру жұ­мыс­тары басталып жатыр.

Күні жылынып, тоң жіби сала Канонер питомнигі және орман тұқым стансасы кешенінде өсірілген екі жылдық қарағай өскіндері қазып алынды. Түп-түзу ретпен өскен жасыл желекті алқаппен алдымен соқа тіркеген трактор жүріп өте­ді. Соқа топырақтың 25-30 сантиметрге дейінгі қа­лыңдықта беткі қабатын кесіп шығады. Мұнда жер жыртқандай, топырақ ауда­рылмайды, тамыр тұсы жер­ден ажыратылады. Бұ­дан кейін жұмысшылар өс­кіндерді жинап алып, жіп­пен буып, тамырын қайта топыраққа көмеді. Келесі кезекте қорабына қар тиелген жүк көлігі келіп, дайы­н болған жас ағаштарды қар­мен бүркеп, тиісті жерге алып кетеді.

Биыл Канонер филиа­лының орман питомнигі және орман тұқым станса­сы кешенінің 3,6 гектар алқабынан ашық тамыр жүйелі 7696,4 мың екі жылдық өскін алынды. Ма­мандардың айтуынша, екі жылдық ағаш өскіндері сапалы. Күтім болса, тез жетіліп кетеді.

– Ашық тамыр жү­йе­лі қарағай өскіндері питомникте екі жыл өсірі­леді. Арам шөбін жұлу, то­пырағын қопсыту, суару, күтіп-баптау жұмыстары жаз бойы жүргізіледі әдет­те. Екі жылдық өскіннің биік­тігі 10 сантиметрден, сабағының төменгі бөлі­гінің жуандығы 4 санти­метрден кем болмауы ке­рек. Өздеріңіз көріп тұр­ғандай, өскіндер бұл көр­сеткіштен артық болмаса, кем емес. Негізі, жос­пар бойынша әр гектардан алынуға тиіс өскін са­нынан әлдеқайда жоғары нә­тиже көрсетіп отырмыз. Демек мамандарымыз тынбай еңбектенді, – дейді Кано­­нер филиалының орман питомнигі және орман тұ­қымы стансасы кеше­нінің басшысы Сырым Мұ­рат­ұлы.

Канонер филиалының тұқымбақ кешенінде өсі­рілген ашық тамыр жү­йелі қарағай өскіндері би­ыл До­лон, Жаңасемей, Мо­ро­зов, Семей филиал­дарына жө­нел­тілді. Алдағы күндері ба­­лапан қарағайлар аталған филиалдардың орман алқа­бына отырғызылады.

 

Шығыс Қазақстан облысы

 

Соңғы жаңалықтар

Мінсіз – кім?

Руханият • Кеше

Семейдегі серпіліс

Аймақтар • Кеше

Ұқсас жаңалықтар