Осылайша Қытай 2022 жылға дейін ғарыш стансасының жұмысын бастауға ниетті. Бүгінгі күні орбитадағы жалғыз станса – Халықаралық ғарыш стансасы. Ал Қытай ол қоғамдастықтан шеттетілгені белгілі.
Жалпы, ғарышты игеру мәселесіне Қытай кештеу араласты. Алғашқы ғарышкерлерін 2003 жылы ғана жіберді. Сөйтіп КСРО мен АҚШ-тан кейінгі ғарышқа адам жіберген үшінші ел атанды.
Қытай бұған дейін де 2 рет зымыран ұшырды. Tiangong-1 пен Tiangong-2 ғарышкерлер тек қысқа уақыт тоқтай алатын тест стансалар еді.
Жаңа ғарыш стансасының салмағы – 66 тонна. Tiangong стансасы сәтті орныққан жағдайда 10 жылға жуық қолданысқа жарайды-мыс. Негізгі бөлігі 16,6 метр болатын станса келген ғарышкерлерге өмір сүруге қажетті технологиялар мен қажет құрылғылармен қамтылған.
Бейжің осымен тоқтамай, алдағы уақытта тағы 10 станса жіберуге ниетті екенін хабарлады. Жақында ғана Халықаралық ғарыш стансасы жобасының тоқтайтыны мәлім болды. 2024 жылға қарай одақтағы Ресей, АҚШ, Канада, Жапония мен Еуропаның бірқатар елі жеке-дара жұмыс істеуі мүмкін. Бұл Қытайдың өрісін аша түспек.
Қытайдың ғарышты игеруге шындап кіріскені елдегі үгіт-насихаттан белгілі. Бір жағынан мұны АҚШ-қа жауап деп түсінуге болатындай. Өйткені АҚШ Халықаралық ғарыш стансасынан шығарып жібергеннен кейін Қытай ғарыш индустриясын өздері жасауға көшті.
Tiangong стансасы шамамен келесі жылдың басында толық дайын болмақ. Оның бір ерекшелігі – бүгінде орбитада қондырылған стансадан жеңіл болуында.
Қытай ғарыш бағдарламасымен айналысатын Чен Лан бұл жобаның үлкен сынақ болғанын жасырмады. «Бұл – Қытай үшін үлкен әрі маңызды жоба», деді сарапшы.