Міне, спорт саласындағы сондай жарыстардың қатарына енді грек-рим күресінен Қазақстаннан шыққан тұңғыш Олимпиада чемпионы, әлем біріншілігінің жеңімпазы және бірқатар халықаралық жарыста ел намысын абыроймен қорғаған Қазақстанның Еңбек Ері Жақсылық Үшкемпіровті еске алуға арналған халықаралық турнир қосылды.
«Өзімнен кейін күрес түрлерінен қазақтан шыққан Олимпиада чемпионын көріп кетсем, арманым жоқ еді», деп көзі тірісінде айтып, кейіннен бұл арманын соңынан ерген балуандарға аманаттап кеткен даңқты балуан Жақсылық Үшкемпіров былтыр дүниеден өткен еді.
Артында қалған ұрпағы, елі Жақсылық Үшкемпіровтің есімін әрдайым ел жадында сақтау үшін биылдан бастап даңқты Олимпиада чемпионын еске түсіруге арналған 2001-2003 жылы туған жасөспірімдер арасындағы халықаралық турнир ұйымдастырды.
Айтулы жарыс елорда төрінде Жақсылық Үшкемпіровтің өз есімі берілген Жекпе-жек сарайында өткізілді. Жарыстың ашылу салтанатына Мәдениет және спорт министрі Ақтоты Райымқұлова, Нұр-Сұлтан қаласы әкімінің орынбасары Бақтияр Мәкен, Біріккен күрес әлемі бюросының мүшесі, Азия кеңесінің президенті Дәулет Тұрлыханов және генерал-полковник Сәт Тоқпақпаев қатысты.
Ақтоты Рахметоллақызы спортшыларға Қазақстан Республикасының Президенті Қасым-Жомарт Тоқаевтың құттықтау хатын жеткізді. «Құрметті достар, баршаңызды Олимпиада жеңімпазы, Қазақстанның Еңбек Ері Жақсылық Үшкемпіровті еске түсіруге арналған халықаралық турнирдің ашылуымен құттықтаймын. Бұл – бүкіл дүние жүзі үшін айтулы оқиға. Жақсылық Әмірәліұлы – қазақтан шыққан тұңғыш Олимпиада чемпионы ғана емес, бүкіл ел ықыласына бөленген ерекше тұлға. Ол саналы ғұмырын еліне қызмет етуге арнап, туған өлкесін өркендетуге өлшеусіз еңбек сіңірді. Жақсылық Үшкемпіровтің өмір жолы өскелең ұрпаққа қашанда өнеге. Халқымыздың біртуар перзентінің есімін ұлықтап, еңбегін бағалау жолында бүгінгідей іс-шараның маңызы зор. Байрақты бәсекеге қатысушыларға сәттілік тілеймін», делінген құттықтау хатта.
Бақтияр Мәкен қазақтың даңқты балуаны Жақсылық Үшкемпіровке елордада ескерткіш ашылатынын айтып өтті.
«Бүгінгі жарысқа, елордамызға келген барша қонаққа қош келдіңіздер дейміз. Жақсылық ағамыз қазір арамызда болмаса да есімі әрдайым жадымызда. Былтыр барша халықтың қолдауымен Нұр-Сұлтан қаласындағы Жекпе-жек сарайына еліміздің біртуар ұлы Жақсылық Үшкемпіровтің есімі берілген болатын. Биыл аталған спорт кешенінің дәл алдына ағамыздың ескерткішін қою жоспарланып отыр», деді қала әкімінің орынбасары.
Үш күнге созылған халықаралық жарыста Қазақстан, Ресей, Грузия, Украина, Тәжікстан, Қырғызстан және Өзбекстаннан келген 250-ден аса жас спортшы 55, 60, 63, 67, 72, 77, 82, 97, 130 кило салмақтарда өзара кім мықтыны анықтады. Жақсылық Үшкемпіровтің өзі белдескен грек-рим күресінде боз кілемге шыққан балуандардан бес отандасымыз халықаралық жарыстың жеңімпазы атанды. Аса жеңіл салмақта (55 кг) өнер көрсеткен жерлесіміз Ерасыл Мамырбеков топ жарды. Отандасымыз финалдық сайыста грузиялық Дмитрий Кхачидзеннен айласын асырып кетті.
Сонымен қатар кейінгі үш салмақтың финалы, атап айтар болсақ, 60, 67 және 77 кило салмақтың алтын жүлде үшін сайыстары қандастарымыздың арасында өтті. 60 килода Нұрсұлтан Базарбеков алтын жүлдені иеленсе, Айбек Есмұратов күміс жүлдені қанағат тұтты. 67 килода Дін-Мұхаммед Қошқар Нұрсұлтан Жомартовқа қарағанда алымды болды. Ал 77 килода Вейсал Эюбовқа тең келер қарсылас табылмады. Ол финалда Нұржан Асанды жеңіп кетті. Аса ауыр салмақта белдескен жерлесіміз финалда қырғызстандық Давран Сыдыковтан айласын асырып, Қазақстан құрамасының қоржынына бесінші алтын жүлдені салды.
Ал 63 және 72 кило салмақтарда грузиялық балуандарға тең келер қарсылас табылмады. 63 килода Диего Чхиквадзе тұғырдың ең биік сатысына көтерілсе, 72 килода Георгий Чхиквадзе алтын медаль жеңіп алды. 82 килода қырғызстандық балуан Бекзат Орункулуулының бағы жанса, 97 килода өзбекстандық балуан Аброрбек Нурмухаммедов мықтылық танытты.
Жалпыкомандалық есепте қазақстандық балуандар бірінші орын иеленді. Кейінгі орынға грузиялық балуандар жайғасты.
