Қазақстан теннис федерациясының мәліметі бойынша, Айнитдинова Беларусь өкілі Анна Кубаревамен бірге Тунистегі жарыста үздік шықты. Қазақстандық-беларусьтық жұп финалда осы доданың бірінші ракеткалары, ұлыбританиялық Сара Бет Грэй мен америкалық Даша Ивановадан 7:5, 6:2 есебімен айласын асырды. Бұл – Г.Айнитдинованың ITF турнирлеріндегі алтыншы жеңісі. Соның екеуінде жекелей, төртеуінде жұптық сында чемпион атанды.
Ал Жібек Құламбаева румыниялық Оана Гавриламен бірге Мысыр астанасы – Каирде өткен халықаралық жарыстың бас жүлдесін олжалады. Финалдық бәсекеде мысырлық Ясмин Эззат – америкалық Клерви Нгоноунимен бақ сынаған Құламбаева мен Гаврила қарсыластарына еш мүмкіндік қалдырмай, 6:4, 6:0 есебімен басым түсті. Бұл – Ж.Құламбаеваның ITF додаларындағы тоғызыншы титулы. Соның сегізінде ол жұптық сында, біреуінде жекелей сайыста жеңіске жеткен.
