Айтысты аталған жоғары оқу орнының Телерадио және қоғаммен байланыс кафедрасының меңгерушісі, ақын Серікзат Дүйсенғазин жүргізіп отырды.
Ауыздығымен алысқан жас жүйріктердің өнерін Аманжол Әлтай, Дәулеткерей Кәпұлы, Иранғайып Күзембаев, Еркебұлан Қайназаров секілді елімізге танымал айтыскерлермен бірге университеттің кәсіподақ ұйымының төрағасы Мақсат Аралханов сарапқа салды.
Төрт сағатқа созылған дүбірлі дода тартысқа толы болды. Жас ақындар еліміздің өткені мен келешегін, мұңы мен қуанышын көркем сөзбен өрнектеді. Қазақы қалжыңның да түбін түсірді.
Сонымен еліміздің әр өңіріндегі жоғары оқу орындарының үкілеп жіберген ақындары жиналған бәйгеде бас жүлдені − Қорқыт ата атындағы Қызылорда университетінің студенті Бексұлтан Орынбасаров жеңіп алды. Бірінші орынды Қазақ ұлттық өнер университетінің студенті Төрехан Совет иеленсе, екінші орын − Х.Досмұхамедов атындағы Атырау университетінің студенті Фариза Жетпісбаеваға бұйырды. Үшінші орынды Қазақ ұлттық өнер университетінің студенті Мұхит Бабақұл қанағат тұтты.
Сондай-ақ қатысушыларға жүлдеден бөлек, елорданың рухани ортасына айналған Л.Н.Гумилев атындағы Еуразия университетінде қызмет істеп, шәкірт тәрбиелеген, бүгінде арамызда жоқ, халқымыздың ардақты азаматтары атынан алты аталым тағайындалды. Айталық, Рымғали Нұрғали атындағы арнайы жүлде М.Әуезов атындағы Оңтүстік Қазақстан мемлекеттік университетінің студенті Ардақ Орынбекке берілсе, Дүрәлі Дүйсебай атындағы жүлдені М.Өтемісов атындағы Батыс Қазақстан университетінің студенті Әділ Ахметов алды. Мырзатай Серғалиев атындағы жүлдені Павлодар педагогикалық университетінің студенті Жұмәлі Мизам иеленсе, Нәубат Қалиев атындағы жүлдеге Л.Н.Гумилев атындағы Еуразия ұлттық университетінің студенті Мұхтар Ұлғасбаев лайықты деп танылды. Ақселеу Сейдімбек атындағы жүлде Е.А.Бөкетов атындағы Қарағанды мемлекеттік университетінің студенті Жандос Бақытұлына бұйырса, Мырзагелді Кемел атындағы жүлде Л.Н.Гумилев атындағы Еуразия ұлттық университетінің студенті Ерасыл Байментаевке табыс етілді.
Сонымен қатар айтысқа қолдау көрсеткен Қазақстандық салалық білім және ғылым қызметкерлерінің кәсіподағы барлық жас ақынды бағалы сыйлықпен марапаттады.
