Аймақтар • 13 Мамыр, 2021

Жылқышы ауылдың жақсылығы

70 рет көрсетілді

Біз – ежелден жылқықұмар, осы бір текті жануарды күтіп-баптап өскен, оның қадір-қасиетін жете білетін халықтың ұрпағымыз. Алайда бүгінде атқа деген құмарлығымыз саябырсып қалғандай көрінеді. Темір тұлпар дегенді шығарып жүрген де өзіміз. Ауылдың өзінде жылқы ұстау дағдылары жойылып барады.

Мұндай салт-дәстүрімізді сақтауда Қошанкөл ауылының тұрғындары өзгелерге өнеге болып келеді. Мұнда жылқы ұстамайтын отбасы сирек кездеседі. Соның бір көрінісіндей, аудан орталығынан Қошанкөл ауылына қарай баратын күре жолдың бойында тұяғымен жер тарпыған сәйгүліктің қоладан соғылған ескерткіші тұр.

Қошанкөл ауылында жыл­қыға арналған музей де бар. Мұнда қасиетті түлікті сипаттайтын сан түрлі экспонаттар мен ат әбзелдері, жылқыға қатысты мазмұнды анықтамалықтар, та­нымдық материалдар қо­йылған. Музейдегі жергілікті мү­сінші шеберлер соққан ат мүсіні де ерекше көз тартады. Қо­шанкөл ауылдық округінің әкімі Ернар Ілиясов музейден орын алған жәдігерлердің бәрі ауыл азаматтарының шын жанашырлық пейілдерінің арқасында жинақталғанын айтып берді. Сонымен бірге ол ауылда ат спортына қатысты іс-шаралар, қыз қуу, көкпар тарту, аударыспақ секілді ұлттық ойындар, тай, құнан, дөнен жарыстарын өткізу дәстүрге айналғанын жеткізді.

– Еліміздің өзге өңірлерінде жылқыға арналған музей бар-жоғын дөп басып айта алмай тұрмын. Егер болмаса, онда біздің ауылдағы республикадағы жалғыз музей болып шығады. Ең бастысы, ауылымызда жыл­қының қадір-қасиетін ұғынатын ұрпақ өсіп келеді, – дейді ол.

Ауыл тұрғындары тек мал өсіріп, мал бағып қоймай, сонымен бірге бұрын айналысып көрмеген тың кәсіптерге де бет бұра бастаған. Бұған «Бастау Бизнес» бағдарламасының ша­пағаты тиіпті. Аталған жоба шең­­берінде қошанкөлдіктер көлемі 500 мың теңге көлемінде қай­тарымсыз несие алып, пайдалы іспен шұғылдана бастаған. Осы орайда тұрғындар жаңа кәсіптің әліппесін игеру үшін «Атамекен» кәсіпкерлік пала­тасының өңірлік өкілдігі жа­нындағы онкүндік онлайн курс­тан өткен.

Жаңа кәсіптерді игеру, әсіресе тұрмысы төмен отбасылар үшін өте тиімді әрі ыңғайлы болып отыр екен. Шағын несиесін өтеу үшін тұрғындардың бірі шағын наубайхана ашса, екіншісі тауық өсіруді қолға алған.

Қошанкөл – жылқыға ғана емес, қойға да бай ауыл. Соңғы жылдары қойдың жүнін қайта жіберерін білмей, дал болғандары да аз емес. Кейін тағы осы «Бас­тау Бизнестің» көмегімен қой жүнін түтіп, өңдейтін шағын аппарат сатып алған.

Президент Қасым-Жомарт Тоқаев белгілеген «Халық үніне құлақ асатын Үкімет» жобасы негізінен электронды форматқа негізделгені мәлім. Мұндай жа­ңашылдық пен қызмет көрсету үрдісі шалғайдағы Қошанкөл ауылы­на да жеткен. Ауылдағылар электронды қызмет арқылы қажетті анықтамаларды үйде отырып-ақ ала алады.

Қошанкөл ауылының тұр­ғындары өңірге сүбелі үлес қосқан азаматтарын да ардақтай біледі. Өмірден өткендеріне тағзым етіп, көзі тірілеріне құр­мет көрсетуді дәстүрге ай­нал­дырған. Осы орайда олар өткен ғасырдағы жетпісінші жыл­дардың аяғы мен сексенінші жыл­дардың басында Қошанкөл совхозның директоры болған Сә­­лімгерей Асан­ғалиевке ес­керт­кіш мүсін орнатыпты.

– Кеңестік кезеңдегі «қызыл директорды» дәріптегені қалай деуі де мүмкін, біреулер. Бірақ қошанкөлдіктер үшін Сәлімгерей ағаның орны бөлек. Ол кісі шөп шабу, егін ору және мал өсіру секілді тапсырманың тасасында қалып қоймай, ең бірінші кезекте ауыл тұрғындарының әлеуметтік-тұрмыстық жағдайына ерекше ден қойған азамат. Өзі басқарған кезде ауылымызды облыстағы ең дамыған, ең сәулетті ша­руашылықтың біріне айналдыра білді. Мұнда мәдениет үйі, бала­бақша, қоғамдық монша, орта мектеп және әкімшілік ғима­раттар бой көтерді. Сол үшін өзі мүшесі болып табылатын компартиядан құқай көріп, қызметінен алынды. Оның есімін жерлестеріміз қашанда құрмет тұтады. Өзі тұрғызған мәдениет үйінің алдына асыл азаматқа арналған ескерткіш қоюымыздың мәні осында, – дейді ауыл әкімі Е.Ілиясов.

Ауыл тұрғындарының бо­йындағы тағы бір жақсы қасиет – өз ауылын шексіз сүйіп, оның бір кәдесіне жарауға әрқайсысының әзір тұратыны. Өздері туып-өскен топырақты қадірлеп, қашанда оған жанашырлықпен қарайтын қошанкөлдіктердің бұл жақсы қасиеті өзге ауыл тұрғындарына да сіңісті болса игі.

 

Темір ҚҰСАЙЫН,

журналист

 

Батыс Қазақстан облысы,

Қазталов ауданы,

Қошанкөл ауылы

 

Соңғы жаңалықтар

Меркель қызметінен кетті

Саясат • Бүгін, 17:30

Сарапшы Головкинді қатты сынап тастады

Кәсіпқой бокс • Бүгін, 16:15

Ұқсас жаңалықтар