Дүниежүзілік рейтингте 665-орында тұрған Я.Шведова бастапқы кездесуін әлемнің 97-ракеткасы, италиялық Мартина Тревизанмен өткізді. Бірінші партияда М.Тревизан отандасымызға бірде-бір гейм берген жоқ – 6:0. Есесіне екінші сетте Я.Шведова тай-брейкте 7:6 (7:4) есе қайтарды. Шешуші үшінші партияда қазақстандық теннисші тағы да тай-брейк жасап, корт қожайынынан жеңісті жұлып алды – 7:6 (8:6). Тартысты өткен бәсеке 2 сағат 35 минутқа созылды. Шведова екінші айналымда әлемнің 1-ракеткасы, аустралиялық Эшли Бартимен шеберлік байқасты. Өкінішке қарай, жерлесіміз 6:1, 6:4 есебімен жеңілуге мәжбүр болды.
Ал аталған турнирде бақ сынаған Александр Бублик пен Юлия Путинцева бірінші айналымда-ақ сүрінген еді. Бублик хорватиялық Марин Чиличтен жеңілсе, Путинцева америкалық Кори Гауфке есе жіберді. Сондай-ақ Михаил Кукушкин іріктеу сынынан өте алмаған болатын.
