![Балабақшаның жоғынан бары жақсы](/media/2021/05/14/crop-12_5_504x923_f97sdb0l.jpg)
Ал Жетісудағы 1 236 мектепке дейінгі білім мен тәрбие беру мекемесінің 184 нысаны – мемлекеттік балабақша болса, 717 балабақша жекеменшік екен. Және жеке инвесторлар ашқан 335 шағын орталық бар. Жалпы, жеке кәсіпкерлер ашқан балабақшалардың үлесі 58,2 пайызды құрап отыр. Балабақшаға деген сұраныс облыстың Алматы қаласымен шектесетін аудандарында жоғары. Бұл түсінікті де, өйткені тұрғындардың дені мегаполиске қатынап жұмыс істейтін ауылдарда баланы мектепке дейінгі тәрбие беру орындарына беру дәстүрге айналған. Осы заңдылық Іле ауданының аумағына да тән. Қазір ауданда балаларды мектепке дейінгі білім беру орындарымен қамтуды 100 пайызға жеткізу үшін жұмыс істеліп жатыр. Бүгінде бұл көрсеткіш 97,5 пайызды құрайды. Ал аудан бойынша мектепке дейінгі ұйымдарда 1 мың 388 тәрбиеші еңбек ететін көрінеді.
Жоғарыда мектепке дейінгі білім мен тәрбие беретін орындарды ашуға жеке кәсіпкерлер мұрындық болып отырғанын айттық. Қазір қалаға жақын ауылдарда көптеген жекеменшік балабақша жұмыс істеп тұр. Жаңадан ашылып жатқандары да жеткілікті. Соның бірі жақында іске қосылған «Айсұлтан-1» бөбекжай балабақшасы. 100 балаға арналған орталық Қоянқұс ауылында орналасқан. «Айсұлтан-1» бөбекжай-балабақшасының жаңадан бой көтеруіне кәсіпкер Қайрат Құлсейітов атсалысқан екен. Жиырма бес жылға жуық бизнес саласында табысты еңбек еткен ол енді ауыл балаларының білім алып, тәрбиелі болуына үлес қосуды мақсат етіп отыр. Балабақшада отызға жуық тәлімгер, тәрбиеші, жұмысшы еңбек ететін болады. Яғни ауыл тұрғындарына жұмыс та табылды.
– Балабақша 100 балаға арналған төсектік жабдықпен толық қамтылды. 30 адамға жұмыс орыны ашылды. Осының бәрін өз қаражатымызбен істеп, балабақшаны талапқа сай етіп салдық. Ғимараттың іргетасынан бастап нормативтік құқықтық актілерде белгіленген санитарлық-эпидемиялық талаптардың сақталуын қатаң қадағаладық. Өйткені балалар кең де жарық әрі қауіпсіз ғимаратта өнер үйреніп, тәрбие алуы керек, – дейді кәсіпкер Қайрат Құлсейітов.
Сондай-ақ балабақшаның ойын бөлмесі ұлттық нақышта безендірілген екен. Ондағы қазақы өрнектер, шаңырақ символы ұлттың мәдениеті мен дәстүрін паш етіп, өскелең ұрпақ санасына ұлтжандылықты жастайынан сіңіруге негіз болады деген сенім бар.
– Қазір жеке кәсіпкерлердің балабақша, дамыту орталықтарын ашуға ынтасы жоғары. Бұл бағыттағы көзқарас бұрнағыға қарағанда түбегейлі өзгерді. Өйткені кәсіпкерлер бұл істе тек пайданы ғана ойламай, мемлекет пен халық алдындағы жауапкершілікті сезініп келеді. Ғимараттардың талапқа сай болуынан бастап тәлімгерлер мен тәрбиешілердің білімі мен біліктілігіне деген сұраныс артты. Бұл, әрине, бәсекенің арқасы. Үздік, озық балабақшаға деген таңдау жоғары. Екінші жағынан балаларды мектепке дейінгі білім беру орындарымен қамту міндеті орындалып жатыр. Біздің ауданда бұл мәселе 100 пайыз шешіледі. Қазірдің өзінде көрсеткіш 97,5 пайызды құрайды. Оған мемлекет те, жеке бизнес те мүдделі, – дейді Іле ауданы білім бөлімінің басшысы Ләззат Кәткеева.