Биыл қаңтарда Оралда архивте болып, Қасымның 1933-1936 жылғы тіршілігінен біраз дерек таптым. Ал биыл наурыздың соңғы үш күнінде Алматы қаласында Қасым Аманжоловтың 1931 жылы «Қызыл әскер» газетінде әдебиет қызметшісі болып қызмет еткендігін дәлелдейтін дерекке жолықтым.
«Қызыл әскер» газеті 1929-1936 жылдары сол кездегі Қазақстан соғыс комиссариатының, өлкелік ОСАВИАХИМ кеңесінің, «Еңбекші қазақ» басқармасының жетілік газеті ретінде шығып тұрған. Өзіңізге белгілі, «Egemen Qazaqstan» газетінің арғы тарихы «Еңбекші қазақ» басылынан бастау алғандықтан Қасым ақынды да «егемендіктерге» жатқызуға заңды негіз бар деп ойлаймын. Қасым Орал қаласында да, Алматыдан келіп «Екпінді құрылыс» газетінде журналист болып қызмет еткен. Сонымен Қасым ақын ғана емес, сонымен қатар газеттерде қызмет атқарған кәсіби журналист. Алдағы уақытта, құдай қаласа, Семей қаласына жол тартпақпын. Өйткені Қасым 1922 жылы Қарқаралыдан «Қызыл керуенге» еріп Семейге келді де, шамамен 1930 жылдың мамырында Алматыға аттанған ғой. Мен, Қасымның Семейдегі сегіз жылдық ортасы от жүректі ақынның сыр сандығын толық ашып береріне кәміл сенемін.
Ал төменде оқырман назарына Қасым Аманжоловтың «Қызыл әскер» газетінде қызмет істеген кезеңінде түсірілген суретті ұсынып отырмын.
«Қызыл әскер» газетінің редакция құрамы: жауапты редактор Кәрім Абдрахманов; жауапты хатшысы Сары Қазбекұлы; әдебиет қызметшісі Ахмет Абдолдаұлы; әдебиет қызметшісі Қасым Аманжолұлы.
Марат АЗБАНБАЕВ
Қарағанды
