Қордың мәліметінше, медициналық сақтандыру қоры арқылы коронавирус пен пневмонияға қарсы күреске 71,6 млрд теңгеден астам қаражат қарастырылған. Биылғы жылдың бірінші тоқсанында Алматы қаласы бойынша індетке қарсы күрес шараларына 14,9 млрд теңге жұмсалды.
«Коронавирус пен пневмония жұқтырған жағдайда пациенттерге медициналық көмек сақтандырылған-сақтандырылмағанына қарамастан көрсетіледі. Сондай-ақ, COVID-19 белгілері байқалған немесе аталған вирусқа шалдықты деген күдік келтірілген азаматтар мобильді бригадалар мен үйдегі стационар қызметіне жүгіне алады», деп хабарлады қор өкілдері.
Жыл басынан бері Алматы қаласында коронавирус инфекциясына қарсы күреске бөлінген 14,9 млрд теңгенің: - 7,8 млрд теңге – медицина қызметкерлеріне үстемақыға; - 5,5 млрд теңге – КВИ бойынша көрсетілген медициналық көмекке және індеттің таралуына жол бермеуге бағытталған іс-шараларға (карантиндік және инфекциялық стационарларда ем қабылдау – 25 мың жағдай); - 1,3 млрд теңге – ПЦР-диагностикаға (168 мың ПЦР тест жасалды); - 253,1 млрд теңге – мобильді бригадалар қызметіне (мобильді бригадалар 44,1 мың қызмет көрсеткен); - 7,4 млн теңге – үйдегі стационар қызметіне (1390 пациентке қызмет көрсетілген) жұмсалған.
«Медициналық сақтандыру қоры» КЕАҚ Алматы қалалық филиалы директорының орынбасары Жанар Кенжебаеваның айтуынша, КВИ-ге бөлінген бюджеттің негізгі бөлігі коронавирусқа қарсы күреске жұмылдырылған медицина қызметкерлеріне қосымша ақы төлеуге жұмсалды. «Жалпы алғанда, қаңтар айында 4987 медқызметкерге 1,8 млрд теңге, ақпан айында 5365 маманға 1,9 млрд теңге қосымша ақы төленді. Наурыз айында 7202 қызметкер 2,7 млрд теңге үстемақы алды», дейді Жанар Кенжебаева.
