ҚХА және этномәдени бірлестіктер мүшелері кездесті

Алқалы жиынды ашқан Қа­зақ­стан халқы Ассамблеясы Төр­ағасының орынбасары – Президент Әкімшілігі ҚХА Хатшылығының меңгерушісі Марат Әзілханов «Қазақстан Республикасы Тәуел­сіздігінің 30 жылдығына арналған Қазақстан халқы Ассамблеясының ХХІХ сессиясы Қазақстанның Тұңғыш Президенті – Елбасы Нұр­сұлтан Назарбаевтың бейбітшілік пен келісім саясатын дамытуға жа­ңа серпін берді», деп атап өтті. Сонымен бірге Ассамблея мен этномәдени бірлестіктерге жа­ңа міндеттер жүктеліп отырған кезең­де бейбітшілік пен келісім саясатына бағыт-бағдар көрсететін әрі тиімділігін арттыруға бағытталған мәселелерге тоқталды.

Іс жүзінде Ассамблеяға елдің жаңа имиджін және ұлттың жаңа біре­гейлігін қалыптастыруға үлес қосу, Ассамблеяның тиім­ді­лі­гін арттыру бойынша шара­лар қабылдау, қоғамдық дипломатия­ны дамыту, достық елші­лері­нің корпусын кеңейту сияқты мін­дет­тер жүктеліп отыр. Осы орайда ҚХА мекемелері кез келген уақытта іс-қимыл кезең­деріне да­йын болуы керек.

Жиын барысында сөз алған  Ақпарат және қоғамдық даму министрлігі Этносаралық қаты­нас­­тарды дамыту комитетінің төр­­ағасы Ғалым Шойкин республикада этносаралық келісім мен жалпыұлттық бірлікті қамтамасыз ету комитет қызметіндегі маңызды бағыт екендігін атап өтті. Осы орай­­да комитетке жүктелген жауап­­кер­шілік те жоғары. Бүгінде об­лыс­тық ішкі саясат орган­дары­ның құрылымында этнос­ара­лық қатынастарды дамыту бо­­йынша бөлімдер құрылған. Бұл өз кезегінде тіл мәселесі, жас­тар саясаты, үкіметтік емес ұйым­дар мен ақпараттық салада өзара ық­пал­дастықты дамытуға мүм­кіндік береді. Бүгінде этнос­аралық қа­тынастарды дамыту са­ласын­дағы мемлекеттік саясатты жү­зеге асыру мен Ассамблея қыз­­метін қамтамасыз етіп отыр­ған «Қо­ғамдық келісім» РММ қыз­ме­тіне тоқталған директор Ербол Шә­уенов биыл атқарылатын маңызды мәселелерді атап өтті.

Кездесу барысында Қазақстан халқы Ассамблеясы төрағасының орынбасары З.Кузиев, Парламент Мәжілісінің депутаты, «Барбанг» Қазақстан күрдтері қауымдастығы төрағасының орынбасары В.Нә­биев, Парламент Мәжілісінің де­путаты А.Хамедов, сонымен бірге  этномәдени бірлестіктердің жетекшілері ҚХА ХХІX сессия­сында Ассамблеяны басқару құқы­ғының Тұңғыш Президент – Ел­басы Н.Ә.Назарбаевтан Президент Қ.Тоқаевқа ауысуының маңызды сая­си нәтиже екендігін атап өтті. Бұл қадам стратегиялық сабақ­тас­тықты, ҚХА үшін де, этностық бірлестіктер үшін де жаңа мін­деттер жүктейді. Осы орайда эт­номәдени бірлестіктердің респуб­ликалық, аймақтық және жергі­лікті көшбасшылары үшін нақты бағдар ретінде жұмыс стратегиялары мен іс-шаралар жоспарлары осыған сәйкес түзетілетін болады.

Кездесуге қатысушылар этно­мә­дени бірлестіктердің ҚХА ХХІХ сессиясының нұсқау­ла­рын жүзеге асырудағы рөлі мен мін­деттеріне, халықтың өзекті әлеу­­меттік мәселелерін шешуге, қа­йырымдылық пен ерікті­лердің нақты жобаларын, эколо­гиялық ак­циялар өткізу, өрт­тен зардап шеккен Риддер қала­сының тұр­ғын­дарына ҚХА тара­пынан көр­сетілген көмек бары­сына тоқ­талды. Сондай-ақ кез­десу шең­берінде этномәдени бірлес­тік­термен өзара іс-қимылдың өзек­ті тұстары, Ақпарат және қоғам­дық даму министрлігі мен «Қоғам­дық келісім» РММ-ның ұлт­ара­лық қатынастар, сондай-ақ Ас­сам­блеяның республикалық этно­мәдени бірлестіктермен бірлес­кен жобаларын жүзеге асыру мәселелері қарастырылды.

АЛМАТЫ