«Әлеуметтік медициналық сақтандыру қоры» КеАҚ Атырау облысы бойынша филиалының директоры Сәбит Құралбектің айтуынша, 15 жасар Әділ Қарабалаев жол апатынан бас сүйек-ми жарақатын алған. Жол апатының зардабынан басы мен бет сүйегінде кемістік пайда болған.
«Сол себептен, оған шұғыл түрде сол жақ париетальды сүйектің краниотомиялық декомпрессиясы жасалды. Аталған ота бас сүйектің косметикалық кемшілігін жоюға мүмкіндік берді. МӘМС жүйесі аясында шұғыл жасалған хирургиялық отаның құны 2,2 млн теңгені құрайды. Елімізде 18 жасқа толмаған балалар МӘМС жүйесінде мемлекет тарапынан сақтандырылатын жеңілдігі бар санаттарға жатады. Осыған байланысты Әділге қымбат ота тегін жасалды. Енді Әділдің бас сүйегінде кемістік болмайды» дейді Сәбит Құралбек.
Оның мәліметінше, жыл басынан бері Атырау облыстық балалар ауруханасында МӘМС жүйесімен 971 ота жасалған. Оның ішінде жоспарлы түрде 191, шұғыл түрде 780 ота бар.
