Келесі 1979 жылы КСРО-ның Португалиядағы мәдениет күндері өткізіліп, оның аясында сол жаққа баратындардың тізіміне «Мойынқұм» ансамблі де, ерекше сенім білдіріліп, енгізілген болатын. Ал бұған, әрине үлкен дайындық керек. Сондықтан да өнерпаздардың аса жауапты сапарға әзірлігін Жамбыл облыстық партия комитетінің идеологиялық хатшысы Ғайникен Бибатырованың өзі (қазір Алматы қаласында тұрады) тікелей қадағалап отырды. Сол сияқты марқұмдар – аупарткомның бірінші хатшысы Айтбай Назарбеков пен үшінші хатшысы Жұмабек Орынбаев екеуі әрдайым ауыл әртістерінің осы орайдағы әрбір әрекетіне ерекше назар аударды. Тіпті өнерпаздардың шеберлігін шыңдау үшін сол кездегі астанамыз Алматы қаласынан арнайы мамандар да шақырылды.
Сонымен алыстағы Португалияда өзге де әріптестерімен мойынқұмдықтар бір айдай болды, оның ішінде бас қаласы Лиссабон мен Мадейра аралы бар, 12 концерт қойып, айды аспанға бір-ақ шығарды. Қызу қанды португалдықтар көк жүзінде қалықтай ұшқан өздеріне таңсық өзгеше сипаттағы тамаша қазақ ән-әуендерін тапжылмай отырып тыңдады, мың бұралған биші қыздардың көзді тартып, көңілді көріктендірген өнеріне сүйсіне қол соқты. Иә, сонда Зинакүл Қаймақова, Рысқұлбек Есбергенов, Эльмира Мұқашева, Тұрсын Мейірқұлов, Мұқан Сартов, Төрехан Нұрманбаев, Ғалым Сейілханов, Қырғыз Зайырқұлов, Тұрар Бердіқожаев, Сатылған Түйебаев, Айсұлу Рсалдиева және т.б. мойынқұмдықтардың өнеріне шетелдіктер ыстық ықыласын танытқаны анық.
Бұл сапарға ансамбльді обком хатшысы Ғ.Бибатырова мен аупартком хатшысы Ж.Орынбаев бастап барып еді. Енді «Правда» газеті «Браво, Мойынкум!» атты мақала шығарды.
Мына суретте сол Португалия сапарынан бір көрініс бейнеленген. Ансамбль мүшелерінің біразы ғимаратқа ілінген өздерінің афишасының жанында тұр. Сол жақ шеттегі мұғалім, мықты домбырашы Абашхан Көлбаев, ал оң жақтан бірінші тұрған көптеген әдемі әннің авторы, Қазақстан Композиторлар одағының мүшесі, бүгінде 76 жастағы Садық Құнанбаев. Шынымызды айтсақ, ортадағы төртеуді анықтауға мүмкіндік болмады...
Айтқандай,1980 жылы Мәскеу олимпиадасы болып еді ғой. Афишадан оның символы – аюдың қонжығы Мишканың да бейнесімен мұндалайды.
