Осыған орай облыс әкімі Гүлшара Әбдіқалықова Арал, Қазалы аудандарына сапарлап, бірқатар елдімекендерді аралады. Аймақ басшысы алдымен Арал ауданындағы Саркөлдің мәселесіне назар аударды. Осы аумақтағы ірі су айдындары Лай көл, Саркөл, Қамбаш көлдері жағалауларынан жырақтап, жиегі балшыққа айналған. Ең қиыны, су ішуге барған аяқты мал ұйыққа батып, көл жағасында өлексе көбейіпті. Қуаңшылық салдарынан жайылым аясының тарылғаны да елдегілерді тығырыққа тіреп отыр. Ауылдағыларды көктемде шыққан көктің жаз тумай күйіп кеткені де алаңдатады. Өріске айдаған малының иістенген көл суын іше алмай қаталап, күннен күнге күйі тайып бара жатқаны да ауылдағылар үшін аз уайым емес.
Аманөткел ауылдық округі әкімі аппараты ерікті жастардан арнайы топ жасақтапты. Олардың міндеті малдың ұйыққа батып қалмауын қадағалау. Тартылған көл мен тауқымет тартқан елдің жағдайын көзбен көрген Гүлшара Әбдіқалықова Сырдария арнасының түсіп кетуі көптеген салаға қиындық тудырып жатқанын айтып, мәселені шешу бағытында атқарылып жатқан шараларға тоқталды.
– Бұл проблема ауылшаруашылық саласына айтарлықтай қиындық келтіріп отырғанын көріп отырсыздар. Осы мәселеге байланысты жуырда облысымызға сапармен келген Экология, геология және табиғи ресурстар вице-министрі Серік Қожаниязов трансшекаралық өзендегі мәселеге қатысты мемлекетаралық келісімдердің жасалып жатқандығын айтты. Біз де жиында министрлікке ұсынысымызды жеткіздік. Сондықтан су тапшылығы проблемасы алдағы уақытта шешімін табады деп үміттенеміз, – деді Гүлшара Әбдіқалықова.
Аманөткел ауылдық округіндегі жағдаймен танысқаннан кейін аймақ басшысы орынбасары Бақыт Жахановқа мәселені күн тәртібіне шығаруды жүктеп, аудан әкімі Серік Сермағанбетовке облыстық экология департаменті, басқа да құзырлы органдармен бірлесіп мәселенің оңтайлы шешілу жолдарын қарауды тапсырды.
Облыс әкімі Арал ауданынан кейін Қазалы ауданы Жалаңтөс батыр ауылындағы егіс алқабын көрді. Ауылмен аттас серіктестік биыл 1560 гектар жерге дән сепкен. Оның 700 гектары – күріш, 150 гектары – жаздық бидай. Топырақ құнарын арттыру мақсатында шаруашылық жоңышқа да егеді.
Облыс әкімі аудан басшылығы мен сала мамандарына шаруашылықтарға суды кезекпен беруді ұйымдастыруды тапсырды.
Қызылорда облысы
