Арқадағы ән сайысы

Осымен сегізінші рет ұйым­дастырылған өнер додасына Нұр-Сұлтан, Алматы қалалары мен Қарағанды, Түркістан, Ал­маты, Жамбыл, Ақтөбе, Ақ­мо­ла, Солтүстік Қазақстан, Пав­ло­дар және Шығыс Қазақстан об­лыстары атынан 36 үміткер қатысып, бақ сынады.

Құрамында Қазақстанның еңбек сіңірген қайраткерлері Ғалым Мұхамедин, Рамазан Стам­ғазиев, Талғат Ыдырысов, Жақ­сыкелді Кемалов, Айтбек Ны­ғызбаев, Ербол Айтпаев және «Құрмет» орденінің иегері Сержан Мұсайын бар қазылар алқасы байқаудың бас жүлдесіне Құрманғазы атын­дағы Қазақ ұлттық кон­серваториясының сту­денті Ақ­жол Өсербайды лайық­­ты деп тапты.

Бірінші жүлде Қазақ ұлттық консерваториясының тағы бір студенті Нұр­­болат Ұзақбайға бұйыр­ды. Екінші орынды пав­лодар­лық Дәуренбек Сләмғали мен алматылық Қас­тер Қаб­дел иеленді. Ал үшін­ші жүл­де қазылар ал­қа­сы­ның шеші­мімен Қазақ ұлт­тық өнер уни­верситетінің сту­ден­ті Айбала Бей­сенова мен Айбек Рымғалиға және Мемлекеттік академиялық фи­лар­мония атынан қатысқан Алуа Қа­лымбековаға бөліп бе­рілді.

Бұдан бөлек, ән байқауының қорытындысы бойынша Қали Байжанов атындағы арнайы сыйлық Сәулет Аманғазинге, Манарбек Ержанов атындағы ар­найы сыйлық Айдос Санияз­бекұлына, Мәдениет Ешекеев атындағы арнайы сыйлық Қос­тыбай Қажыбиге және Рымбай Бөдесов атындағы арнайы сый­лық Бекзат Ермекбайға та­быс етілді. Аталған өнер­паздардың барлығы да Алматы қаласынан келіп бақ сынады. Ал Мейірхан Адамбеков атындағы арнайы сыйлықты қызылжарлық әнші Еркебұлан Қарыпов иеленді.

Жеңімпаз және жүлдегер өнерпаздарға лайықты сый-сияпат жасалды.

ҚАРАҒАНДЫ