Шағын қаланың тұрғындарын елең еткізген жақсылық сөресін ұйымдастыруға аудан әкімінің орынбасары Орынбасар Ахметова, аудандық жұмыспен қамту және әлеуметтік бағдарламалар бөлімінің басшысы Ырысжан Әбжанова ұйытқы болыпты. Шапағат шуағын төгіп тұратын бағалы бастаманы «Аз-али» дүкенінің ұжымы бірден қолдай кеткен. Аталған іс-шараға кез келген адам қатыса алады. Қайырымдылық акциясы барысында арнайы ашылған сөреге жаны жомарт қала тұрғындарының кез келгені әлдебір тауарды сатып алып, қойып кетсе болғаны. Осы жерден әлеуметтік жағынан аз қамтылған немесе қолы қысқа адамдар қажетті затын тегін алады. Қайырымды жандар күнделікті сұранысқа ие тауарларға басымдық беріп отыр.
Ел іші қашанда кең емес пе?! Әрине, бұл арада қала тұрғындары қамқорлық атаулыдан қағажу қалып, әлдекімге қол жайып отыр деген ұғым тумаса керек. Ең бастысы, қайырымдылықтың бүр жарып, көктеген жері осы деп айтсақ, артық болмас еді. Ересектердің осы бір әдемі әрекетін көрген балалар да ата-аналары балмұздақ ал деп берген азын-аулақ тиын-тебенін жақсылық сөресіне жұмсағанын көрген жанның көңілі гүлдеп кетер еді. Қазір жақсылық сөрелері қажетті затқа толы. Тіпті, қоярға орын болмай тұр деп айтуға болады. Зат емес, қамқор көңілдің ақ ниеті ғой толып тұрған.
