Іс-шараны Қазақстан Республикасының Тұңғыш Президенті – Елбасы кітапханасы, Нұрсұлтан Назарбаев қоры, Қазақстан Республикасы Ақпарат және қоғамдық даму министрлігі ұйымдастырды.
300 адамды қамтыған форумға Әзербайжан, Беларусь, Қырғызстан, Ресей, АҚШ, Түркия, Франция жастар ұйымдарының өкілдері, Қазақстан аймақтарының көшбасшы жастары, Қазақстан Парламенті мен облыстық, қалалық мәслихаттардың жас депутаттары, кәсіпкерлер, ғалымдар, спортшылар, «Болашақ» бағдарламасының түлектері, «Қазақстанның 100 жаңа есімі» жобасының жеңімпаздары, еріктілер және шығармашыл жастар қатысты.
Тұңғыш Президент Нұрсұлтан Назарбаев қатысушыларға құттықтау хат жолдады. Оны форум модераторы, Елбасы кітапханасының директоры Бақытжан Темірболат оқыды: «Жастар – қоғамның қозғаушы күші, үкілі үміті. Егемендік жылдары елімізде санасы азат, ойы сергек тұтас бір жаңа буын қалыптасып, өсіп жетілді.
Өздеріңіз білетіндей, әр ұлттың бәсекеге қабілетті болуы ең әуелі білім сапасымен өлшенеді. Сіздер заман талабына тез бейімделіп, қиындыққа қасқая қарсы тұруға тиіссіздер. Бүгін де, дағдарыстан кейін де ең маңызды даму тренді – адами капиталдың сапасы. Зерделі де зерек, білімді де білікті жастары бар елдің қашанда еңсесі биік, ертеңі нұрлы болмақ», делінген Елбасының құттықтау хатында.
Өз сөзінде Бақытжан Темірболат Қазақстан Республикасының Мемлекеттік рәміздер күнінде өтіп жатқан форумның маңыздылығын атап өтті.
Жиынға қатысқан Мемлекеттік хатшы Қырымбек Көшербаев құттықтау сөз сөйледі (Мемлекеттік хатшының сөзі бөлек беріліп отыр).
Nur Otan партиясы Төрағасының бірінші орынбасары Бауыржан Байбек жиында бас қосқан жастарға жаһандық өзгерістерге еліміздің әр азаматы бейімделе білуі керектігін еске салды.
«Қазіргі кезде қарқын алған жаһандық өзгерістерге еліміздің әр азаматы бейімделе білуі керек. Бұл ретте жастарға артылатын сенім мен жауапкершіліктің жүгі зор. Елбасы айтқандай, біздің басты үш қағидатымыз – жауапкершілік, командалық рух және өзіміздің құндылықтарымызға берік болуымыз керек. Партия мүшелеріне арнап айтылған бұл сөздер кез келген жас үшін де темірқазық бола алады деп есептеймін. Осы орайда жетістікке жеткісі келетін әр жас осыларды ұстануы керек», деді партия Төрағасының бірінші орынбасары.
Ақпарат және қоғамдық даму министрінің міндетін атқарушы Серік Егізбаев «Бабаларымыз ертеден аңсаған тәуелсіздігімізге қол жеткізіп, Ұлы дала төріне әлем мойындаған мемлекет құрғанымызға биыл 30 жыл толып отыр. Бұл аралықта еліміз тұрақты даму жолына түсіп, тарихта бұрын-соңды болмаған зор жетістіктерге қол жеткізді. Әлемдегі бәсекеге қабілетті 50 елдің қатарына енді. Тұңғыш Президентіміз – Елбасы Нұрсұлтан Назарбаев: «Мемлекеттік рәміздер – біздің мемлекетіміздің, біздің егемендігіміздің берік негізінің бірі. Олар тәуелсіздіктің қасиетті біріктіруші образын білдіреді», деген болатын», деді.
«Ежелден ата-балаларымыз өз атамекенін, Отанын, тілі мен мәдениетін, салт-дәстүрі мен Мемлекеттік рәміздерін жүрекпен сүйе білген, қорғаған әрі келешек ұрпағына да сол отансүйгіштік тәрбиені берген. Жастар – сіздер болашақтың мәңгілік қозғаушысы, үлкен күшсіздер. Оған дәлел – ел намысын байрақты бәсекелер мен дүбірлі додаларда қорғап, күн астында қыраны қалықтаған көк Туымызды биіктен жебіретіп жүрген жас жерлестеріміздің жетістіктері. Қазақстан халқының әр бесінші азаматы 14-тен 29 жас аралығындағы ел жастары саналады. Мемлекет басшысы Қасым-Жомарт Тоқаев: «Қазақстаның болашағы саналы әрі талапты ұрпақтың қолында» деген болатын. Жастарымыздың дамуына мемлекет тарапынан барлық мүмкіндік пен жағдай жасалып жатыр. Олардың әл-ауқатын жақсарту мен болашаққа сенімін арттыру – ел Президенті жүргізіп жатқан жастар саясатының басты бағыты», деді Серік Егізбаев.
Сондай-ақ елорда әкімі Алтай Көлгінов, Нұрсұлтан Назарбаев қоры атқарушы директорының орынбасары Әлкей Марғұланұлы, «Халықаралық бағдарламалар орталығы» АҚ директоры Айнұр Карбозова, халықаралық жастар ұйымдарының басшылары жиынға жиналған жастарды құттықтап, игі тілектерін білдірді.
