Тасбақаның шөбін алған адамның қалауы болатыны туралы аңыз бар. Жазушы Әбіш Кекілбаев «Тасбақа шөбі» атты әңгімесіне арқау болған әпсана. Үмітсіз келе жатып, кенет үміті оянған пенденің тағдырын сөйлетеді. Алып тасбақаны бесік еткен сәбидің әрекетіндей ойлы. Біз назарларыңызға ұсынған, мұндағы «Кішкентай император» картинасы соны меңзейді. Белгілі суретші Дәурен Қастеевтің туындысы аңызбен астасып жатыр.
Вертикаль пішінді картинадан буырқанған сары-жасыл бояулардың арасындағы тасбақа сауытының үстінде ұйықтап жатқан кішкентай баланы көреміз. Бұл көрерменнің қызу пікірін тудыратын ерекше маңызды әрі философиялық туынды өз сезімдеріңді жинақтап, толғануға мәжбүрлейді.
Әлемдік түсінікте тасбақаның рөлі мифтік құбылыстарға ие. Ол ежелгі жануарлар түріне жатады және әлемдегі көптеген мәдениеттің символы ретінде де мәні жоғары. Шығыс халықтары жалпы әлем жаратылысының басталуын осымен байланыстырады. Ежелгі гректер тасбақа физикалық үрдістердің тұрақтылығын білдіреді десе, Үндістан тұрғындары осы күнге дейін тасбақа жер бетіндегі барлық жанды нәрсенің түп анасы деп санайды.
Ежелгі мифтер тасбақаның сауыты көктің аспан күмбезі, ал судың ортасында қалқып жүрген Жер болса, оның тіршілігі деп айтады. Оны отбасына молшылық пен сүйіспеншілік әкеледі деп санаған. Символдық аналогияның қытайлық жүйесінде тасбақа қасиетті бес жануардың бірі ретінде солтүстікті, суды және қысты білдірсе, ал оның сауытының сынығын сәуегейлікке пайдаланған. Бұл жануар ұзақ өмір сүруді, кемеңгерлікті, тұрақтылықты, табандылықты, денсаулықты және қорғаушыны білдіреді.
Қытайда отбасындағы жалғыз баланы «Кішкентай император» деп атаған, өйткені мұндай балаларға бәріне рұқсат етіледі. Қытай баласы ата-анасы да, мұғалімдері де, өткен-кеткен де, тіпті күн де барлығы сол баланың төңірегінде айналуы қажет бүкіл әлемнің кіндігіне айналады.
Суретші жасыл түстің суық реңктерін жылы сары түспен керемет үйлестіре білген. Бізге сәбиді күн сәулесінің жылуы қоршап тұрғандай. Ал кәрі тасбақа «Кішкентай императорды» қауіп-қатерден, тауқыметтен қорғап уақыт пен кеңістікте баяу қозғалып бара жатқандай көрінеді.
Білесіз бе, тасбақа жердің астынан сүлдерін сүйретіп әрең шыққанда, дауыл тасбақаның үстінің шаңын қағу үшін соғады екен. Ең ғажабы тасбақаның дауылы тасбақадан басқаның бәрін көтеріп кететін құдіретке ие. Тасбақа орнында қалады, басқаны көктен ізде, жерден ізде, таппайсың. Қазақ емес деңізші, нақ өзі. Қазақ деген – дәл қазір «кішкентай император» секілді.
