Қоғам • 21 Маусым, 2021

Желіде вакцина паспортына қатысты жалған ақпарат таралуда

Мессенджерлерде жақын арада вакцина паспорты жоқ адамдар өз көліктерін оталдырып, дербес компьютерлер мен басқа да жабдықтарды қолдана алмай қалады деген хабар тарады, деп хабарлайды Egemen.kz.

Гауһар ҚАПАШ

Болжам бойынша, вакцинация паспорттарында «ақылды» құрылғыларды іске қосатын QR код бар. Бұл кодтарсыз гаджеттерді пайдалану немесе көлікті оталдыру мүмкін болмайды екен.

QR код, қарапайым тілмен айтқанда, штрихкодтың жетілдірілген нұсқасы. Әдетте, QR кодтар кез келген ақпаратты оқу үшін қолданылады. Осындай жетілдірілген штрих-кодтардың көмегімен тауар немесе қызмет туралы деректерді алуға, құжаттың, іс-шараға немесе қоғамдық көлікке билеттің түпнұсқалығын тексеруге болады. Вакцинация паспортында QR код бар.

Қазақстандық вакциналау паспорттарында олар құжаттың түпнұсқалығын тексеру үшін қызмет етеді. Еуроодақ елдеріндегі вакцинация паспорттарында адамның қашан, қайда және қандай вакцинамен егілгені туралы маңызды ақпарат берілген. Бұл туралы Еуропалық комиссияның ресми сайтында айтылған.

Мұндай QR кодтар оқу құрылғыларына зиян келтіре алмайды. Кодты оқу үшін арнайы қосымшасы бар смартфон немесе интернетке қосылған компьютер қажет. Компьютердегі кодты оқу үшін арнайы сайтқа код кескінін жүктеу керек. Кодта жазылған ақпаратты қолмен де тексеруге болады, бірақ бұған уақыт кетеді. Көлікті басқарудың электронды блогы, компьютер немесе айналамыздағы басқа құрылғылар QR кодты өздігінен тани алмайды.

Демек, вакцинацияланбаған адамдар вакцинация паспортының QR-нан туындаған теріс әсерге байланысты автомобильдер мен техниканы пайдалана алмайды деген хабарламалар жалған болып табылады. Бұған ешқандай ғылыми негіздеме жоқ, ал құжаттардағы QR-кодтардың мазмұны құпия емес.

Күннің маңызды және өзекті жаңалықтарын «Егемен Қазақстан» телеграм каналынан оқыңыз