Аймақтар • 22 Маусым, 2021

Біржан сал еліндегі береке

13 рет көрсетілді

Өңір «қызыл аймақтың» құрсауында тұрған кезде аудан тұрғындары бір-біріне қол ұшын созып, қамқор бола білді. Ел болған соң көмекті қажет ететіндердің де кездесіп жатуы әбден мүмкін. Бір жақсысы, олардың ешқайсысы қиындықпен жалғыз алысқан жоқ. Ежелден бірлігі бекем өңірде жан шуағының жылуы сезіліп тұрды. Әсіресе, жас толқынның жанашырлығы егде адамдардың сүйіспеншілігін тудырды.

Аға буын заманының осы бір қиын кезінде ел иығына түс­кен ауыртпалықты кә­теп­ті қара нардай бірге көте­ріскен жас­тарға, мектеп оқу­шыларына дән разы болып, ақ баталарын берді. Тәлімді тәрбие алып, жас құрақтай жетіліп келе жатқан жастар болса, мақтау-марапаттау үшін емес, өздерінің жүрек қа­ла­­уы­мен қауіп-қатерге қара­­май, ізгілікпен әдіптелген ізет­ті іс-қимылдарын өрістете берді.

Әрбір көкіректе қиын уа­қытта қысылған адамдарға қамқор болсам екен деген ізгі ниет еріктілер жылының аясында кеңінен өріс­теді. Аудан орталығындағы №1 орта мектептің еріктілері мен жас­тар ресурстық орталығы «Біз біргеміз» акциясы аясында көп еңбек етті.

Жан шуағын себезгілейтін, естіген жанның ет жүрегін елжі­рететін нәтижелі іс-қимыл жас толқынның тарапынан жасалуы тіпті қуанышты. Аудандағы Ма­кинка, Бұланды Донской, Мақпал орта мек­тептерінің оқушылары республикалық «Қазақстан – мейірімділік мекені» акция­сын бірден қолдап әкетті. Ең алдымен мұқият тізім жасалды. Ерікті жастар қол­дау-көмекті қажет ете­тін адам­дардың назардан тыс қалып қой­мауына айрықша мән берді. Жақсылық жасауға топ­тасқан жас қауым тізім бо­йынша мекенжайларға барып, олар­дың өтініштерін тыңдап, қолдан келер көмектен аянып қалған жоқ. Бұл өңірде қар қалың түседі. Жалғызілікті жандарды қыста қинайтын жай да осы. Өткен қыста топ-топ болып аула аршыған жас толқын жүздеген текше метр қарды елді мекеннің сыртына шығарып берді.

Дерт дүмеп тұрған кезде алдын алу мақсатында жадынамалар үлестіріп, облыстың бас санитарлық дәрігерінің карантин кезіндегі шектеу мен толықтырулар туралы қаулысын таратып, жалпақ жұртты құлақ­тандырды. Созылмалы сырқаты бар, қарға адым жер мұң болып отырған қарияларға емханадан тегін дәрі-дәрмектерді апарып беріп, алғыстарын арқалады.

Жақсылық жасаудан аға буын да шет қалған жоқ. Мә­селен, «Семізбай-U» серік­тестігі прови­зорлық стацио­нарға 2 оттегі конденсаторын, 10 пульсоксиметр, онда­ған дана комбинезон, меди­циналық халат, төсектік орын жабдықтарын сатып алып берді. Жинақтай айтқанда, осы заттар үшін серіктестік 2,5 млн теңге қаражатын жұмсады. Ал ел жайы десе елеңдеп тұратын еріктілер өз қолдарымен әде­мі­леп, берік етіп бетперделер тігіп, тұрғындарға тегін та­ратты. Көп балалы және аз қам­тылған отбасыларына, ең­бек ардагерлеріне қаржылай кө­мек көрсетті, азық-түлік се­­беттерін таратты.

Облыстық «Жас Отан» жастар қанатының төрағасы Сұлтанбек Бекешев, «Феникс» еріктілер орталығының же­текшісі Сұлтан Жолдыбаев жастармен семинар кеңестер өткізді. Жиын барысында ел бірлігін нығайта түсетін жақсылық шарапаттың игі әсері туралы әсерлі әңгімелер айтылды.

Біржан сал еліндегі бере­келі шаруа ең алдымен тұтас­тықты, адамгершіліктің дә­ні себілген аймақта жақ­сы­лықтың жалауы биіктеп тұратынын көрсетіп берді. Жанашырлық ісімен өзгеге үлгі-өнеге болған жастардың шаруа­сы атап айтуға тұрарлық.

 

Ақмола облысы,

Біржан сал ауданы

 

Соңғы жаңалықтар

Бір қуантып, бір мұңайтқан сала

Экономика • Бүгін, 21:52

Ақтөбеде қоқыс полигоны өртенді

Аймақтар • Бүгін, 19:58

Туристке де тәртіп бар

Аймақтар • Бүгін, 18:06

Доллар қайта қымбаттай бастады

Экономика • Бүгін, 11:47

Ұқсас жаңалықтар