Аймақтар • 29 Маусым, 2021

Сырдағы айтыскерлер сайысы

122 рет көрсетілді

Қызылордада облысы әкімдігінің ұйымдастыруымен ел Тәуелсіздігінің 30 жылдығына арналған «Тұғыры биік Тәуелсіздік» атты республикалық ақындар айтысы өтті. Н.Бекежанов атындағы театрда өткен сөз сайысын облыстық мәслихат хатшысы Наурызбай Байқадамов ашып, еліміздің отыз жыл ішіндегі жеткен жетістіктеріне тоқталды, аламанға қатысатын ақындарға сәттілік тіледі. Nur Otan партиясы облыстық филиалы қолдау танытып отырған додада Қазақстанның еңбек сіңірген қайраткері Жүрсін Ерман дәстүрлі өнерге демеу көрсеткен жергілікті әкімдікке, айтысты айрықша бағалайтын көрерменге ризашылығын жеткізді.

Айтысқа республикалық «Жұл­дыз» журналының бас редакторы, Қазақ­станның еңбек сіңірген қайраткері Ғалым Жай­лыбай, Ш.Мұртаза атын­дағы ру­ханият және тарихтану орта­лығы дирек­торының орынбасары, Мәдениет саласының үздігі Ахметжан Өзбеков, айтыскер ақын, Қ.Мырзалиев атындағы Ба­­тыс Қазақстан облыстық өнер орта­лығының директоры Ба­уыр­­жан Халиолла, айтыскер ақын, Мә­дениет сала­сының үз­дігі Серік Ыды­рысов, ақын, ре­жис­­сер, Мәдениет қайраткері Оң­талап Нұрмаханов қа­зылық етті.

Еркіндік тақырыбын ар­қау еткен сөз сайысына түр­кіс­тандық Бекарыс Шой­беков, Арқалықтан келген Айбек Қа­лиев, Нұр-Сұлтан қаласының атынан Әсем Ережеқызы, Пав­лодар облысынан Аспанбек Шұ­ғатаев, Батыс Қазақстаннан Бауыржан Ширмединұлы, шы­ғысқазақстандық Серік Қуан­ған мен Семей қаласынан Айшолпан Тілеутай қатысты. Сөз барымтасындағы ақындар қатарында Айдос Рахметов, Мұхтар Ниязов, Нұрмат Ман­сұров, Нұрзат Қару және Жамбыл Ба­қытәліұлы сынды Сыр жүй­ріктері ел алдына шықты.

Жыр додасында ақындар ер­кіндіктен бастап қазіргі ел тұрмысын жырға қосты. Қо­ғам­дағы өткір мәселелерді айтып, тыңдаушы жұрттың айызын қан­дырды.

Республикалық ақындар ай­тысының қорытындысында облыс әкімі Гүлшара Әбдіқалықова еркіндіктің елең-алаңынан бастап, бүгінгі күннің бейнесін суреттеген доданың маңыздылығына тоқталды, рухани құндылықтар мен ұлтымыздың салт-дәстүрін дәріптеуде айтыстың орны ерекше екенін атап өтті. Ұлт сөзін сөйлеген ақындарға алғысын біл­діріп, елге ынтымақ пен береке тіледі.

Жалпы осы айтыста қазалылық Нұрзат Қару жарқырай көрінгенін айта кеткеніміз жөн. Алғашқы айналымда «Айтыстың ақтаңгері» атанған Айбек Қалиевке қар­сы­лас болған талантты қыздың та­уып айтқан сөзіне қол соққандар көп болды. Одан кейін де арынын тежеместен оза шауып, бас бәйге алды. Бірінші орын Мұх­тар Ниязовқа бұйырды. Екін­ші орынды белгілі айтыскер Бе­к­арыс Шойбек, үшінші орынды Аспанбек Шұғатаев, Әсем Ере­жеқызы, Айбек Қалиев сынды ақындар иеленді. Ал Нұрмат Ман­сұр қазылар шешімімен Жүр­сін Ерман атындағы арнайы жүл­деге лайық деп танылды. Серік Қуанған, Ай­шолпан Тілеутай, Ай­дос Рахметов және Бауыржан Шир­мединұлына ынталандыру сыйлықтары табысталды.

Облыс әкімі Гүлшара Әбді­қалықова 70 жасқа толған ұлт өнерінің жанашыры Жүрсін Ер­манға дәстүрге сай шапан жа­уы­п, аймақ тұрғындары атынан құрмет көрсетті.

 

ҚЫЗЫЛОРДА

 

Соңғы жаңалықтар

Ұқсас жаңалықтар