Әскери оқу орындарын бітіру рәсімдеріне байланысты, шілдеде жас офицерлер мен сержанттар әскерде қызмет атқаруға барады. Қолбасшыларға олардың қызметтік міндеттерге бейімделуін және әлеуметтік мәселелерін шешуді қарастыруға нұсқау берілді.
Қарулы Күштерде COVID-19-ға ұжымдық иммунитет қалыптасқанын ескере отырып, жауынгерлік даярлық шаралары толық деңгейде өткізілуі тиіс. Бас әскери-медициналық басқарманың бастығы жеке құрамның 82 пайызы екпенің екі компонентін алғанын баяндады. Сонымен қатар әлеуметтік қашықтық пен бетперде режімін сақтау өзекті күйінде қалып отыр.
Қорғаныс министрі Нұрлан Ермекбаев елдегі санитарлық-эпидемиялық жағдайға байланысты өңірлер әкімдіктерінің алдын алу шараларына Қарулы Күштерді қатыстыру мәселесін қарауды тапсырды. Атап айтқанда, бұл объектілерді дезинфекциялауға, әскери-далалық госпитальдерді ашуға, азаматтарға көмек көрсету үшін медицина топтарын құруға қатысты.
Кеңесте әскерді қайта жарақтандыру барысы қаралды. Бүгінде әуе шабуылына қарсы қорғаныс құралдары – басты назарда. 2019-2020 жылдары Қазақстан әскерінің қарулануына Ресейдің «Бук» зениттік-зымыран кешендері, Беларусьтің «Роса» радиолокациялық станциялары (РЛС), сондай-ақ еліміздің әуе шептерін қорғауда тұрған отандық «Нұр» РЛС-тары жеткізілді.
Жуырда заманауи «Тор-М2К» зениттік-зымыран кешендерін жеткізу жоспарлануда. «Тор-М2К» кез келген үлгідегі ұшақтар мен тікұшақтарды, соның ішінде «көрінбейтін» технологиямен жасалған тікұшақтарды және ұшқышсыз ұшу аппараттарын, жоғары дәлдіктегі қаруды, радиолокацияға қарсы және қанатты зымырандарды, басқарылатын авиациялық бомбаларды анықтап, жоюға қабілетті.
Қазіргі уақытта уәкілетті орган – Индустрия және инфрақұрылымдық даму министрлігі жеткізушімен шарттар жасасу үстінде. Қорғаныс министрлігі аталған кешенді әзірлеген зауытта отандық ӘШҚҚ әскерлерінің мамандарын оқытуды жоспарлап отыр.
«Егемен-ақпарат»
