Спорт • 30 Маусым, 2021

«Барыс» басшылары не ойлап жүр?

63 рет көрсетілді

Құрлықтық хоккей лигасында (ҚХЛ) бақ сынайтын «Барыстың» жаңа маусымға дайындығы аса мәз болмай тұр. Маусымаралық үзілісте қазақстандық ұжымның құрамы күшеюдің орнына күн сайын әлсіреп барады. Мәселен, бүгінге дейін командадан 15 хоккейші кетті. Ал олардың орнына небәрі бес ойыншы ғана келді. Олардың екеуі қақпашы болса, екеуі – қорғаушы, тағы біреуі – шабуылшы.

ҚХЛ-дің кезекті маусымының бас­та­луына екі ай қалса да, елордалық ұжым әлі де бас бапкер Юрий Михайлиспен бір ымы­раға келе алмай жатыр. Былтыр бір жыл­дық келісімшартқа отырған екі тарап әлі күнге дейін келісімнің созылғанын не­ме­се тоқтағанын хабарлаған жоқ. Бас бап­­кер нақтыланбаған соң, «Барыс» құра­ма­­дан кеткен ойыншылардың орнына ла­йық­ты ойыншылар ала алмай отырған сыңайлы.
Жоғарыда айтқанымыздай, «Барысты» бүгінге дейін өрге сүйреп келген 15 хок­кейші елордалық ұжымнан кетті. Әзірге астаналық клубпен соңғы болып қор­ғаушы Леонид Метальников қоштасты. Ол алдағы маусымнан бастап Влади­вос­токтың «Адмирал» клубының намысын қорғайды. Өскемен хоккей мектебінің түлегі Метальников «Барыс» сапында 2015 жылдан бері өнер көрсетіп келеді. Алты жылда ол ҚХЛ-да 95 матч өткізіп, 16 (1+15) ұпай жинаған. Сондай-ақ Лео­нид әр жылдары «Казцинк-Торпедо» (Өскемен), «Южный Урал» (Орск) және «Сарыарқа» (Қарағанды) клубтарында ойнап, 2018/19 маусымда Жоғары хоккей лигасының (ЖХЛ) чемпионы атанды. Петров кубогын иеленген тұста жылдың үздік қорғаушысы деген атаққа ие болды.
«Адмирал» былтырғы маусымда пандемияға байланысты ҚХЛ ойындарына қатысқан жоқ.
Сонымен қатар мұның алдында «Барыс» сапынан Қазақстан ұлттық құра­масының қорғаушысы Валерий Орехов та кетіп, финляндиялық клубқа ауысқан. Тіпті 22 маусымда финляндиялық ХПК клубы Ореховтың ресми түрде команда сапына ауысқанын жариялап, ойыншыны дүйім жұртқа таныстырды. 21 жастағы хоккейшінің бір жылдық келісімшартқа қол қойғаны туралы да хабар таратты. Осы ақпараттан кейін «Барыс» Ореховтың мансабын Финляндия чемпионатында жалғастыратынын растады. Алайда елор­далық клуб бірер күн өткен соң өз ойын­­шы­сының басқа клубқа ауысуы туралы ақ­паратты жоққа шығарып, қорғаушы алдағы маусымда «Барыста» ойнайты­нын мәлімдеді.
ҚХЛ-дың былтырғы маусымында Оре­хов 32 матч өткізіп, 10 (2 + 8) ұпай жинады және бір плей-офф ойынында нәтижелі пас берген.
Жалпы жазғы үзілісте «Барыстан» кет­кен соңғы ойыншы Метальников болады деген үміттеміз. Қазіргі таңда елордалық клубта бес-ақ қорғаушы қалды. Олар – Даррен Диц, Самат Данияр, Егор Шалапов, Олле Альсинг және Эриек Мартинссон. Бүкіл маусым бойы осы бес қорғаушы ойнамайтыны белгілі. Енді «Барыс» кем дегенде тағы да бес қорғаушымен құрамын күшейтуі керек. Шебер шабуылшылар да керек-ақ.

Соңғы жаңалықтар

Ұқсас жаңалықтар