Суреттерді түсірген автор
– «Batyrs Battle» еліміздің төрт қаласында – Өскеменде, Ақтөбеде, Түркістанда және Нұр-Сұлтанда өтеді. Күні кеше Шығыстың бас шаһарында жарыс алауы жағылды. Сәтін салса, Қажымұқан, Балуан Шолақ айналысқан жаттығуды халық арасында насихаттағымыз келеді. Бабаларымыздың білек күштерін бүгінгі ұрпақ сезінсі екен, – деп өз ойымен бөлісті Мәдениет және спорт министрлігінің амбассадоры Сергей Цырульников.
Елімізде бұрын-соңды ұйымдастырылмаған ерекше жобаға қатысамыз деп келген жігіттер де тепсе темір үзердей екен. Олардың ішінде Халықаралық дәрежедегі спорт шеберлері де болды.
Дейтұрғанмен, Қажымұқан айналысқан спорт олар үшін оңайға соқпады. Әр түрлі салмақтағы қаптарды, зілдей тасты көтерді. Жуан темірді майыстырып көрді. Білектегі бұлшық еттері ойнап тұрғанымен, қап көтере аламай сан соғып жүргендерді де көрдік.
Сұңғақ бой, кең иық болғанымен, белдесуде әлсіздік танытқандар да жүрді.
Әр бөлімнің арасында Қажымұқанның балуандығын насихаттап жүрген Сергей Цырульников те темір илеп, тақтайға шеге қағып, өз өнерін ортаға салды. Сергейдей ұлдың батыр бабамызды насихаттап жүргеніне көпшілік көрермен шын ризашылығын білдірді.
Жарыс арасында көрермендер де білек күштерін сынап көрді. Бірақ, 24 келілік қылышты тік тұрып көтеруге әркімнің шамасы жете бермеді.
Балуандар Қажымұқан бабаларындай ауыр таспен де алысты.
Сонымен, «Batyrs Battle» сайысында күш сынасқан Максим Осипов, Александр Никитин, Роман Каунов, Евгений Епифанов, Андрей Лютовский сынды балуандардың ішінен басым түскен грек-рим күресінен спорт шебері Салауат Ахметқали болды. Ұйымдастырушы Сергей Цырульниковтың айтуынша, «Batyrs Battle» сайысының нүктесі тамыз айында Нұр-Сұлтан қаласында қойылады.
