Өнер • 03 Шілде, 2021

Елордада халықаралық опера академиясы ашылады

4 шілде күні Нұр-Сұлтан қаласында Astana Opera Халықаралық опера академиясы жұмысын бастайды. Академияның негізгі мақсаты – еліміздің және тұтастай еуразиялық кеңістіктің жас әншілерін кәсіби тұрғыдан даярлау, деп хабарлай Egemen.kz.

Әсел САРҚЫТ

«Астана Опера» театрының директоры Қазақстанның еңбек сіңірген қайраткері Ғалым Ахмедьяров опера академиясын ашудың маңызын атап өтті. Оның айтуынша, әлемде көптеген әйгілі театрдың өзіндік опера академиясы бар. Онда жас вокалистерге кәсіби тұрғыдан жетілуге мүмкіндік беріледі әрі үлкен сахнада жұмыс жасауға дайындайды.

«Бүгінде Қазақстанда кәсіби вокал мектептері бар, ол жерде опералық ән айту өнерін үйретеді. Біздің академиямыздың бірегейлігі – конкурстық тыңдау нәтижелері бойынша академияға түскен жас әртістер вокалдан сабақ алудан бөлек, екі жыл бойы түрлі пәндерді оқиды. Бұдан бөлек, жас вокалистердің болашағы жарқын: әлемнің танымал әншілері мен өз қызметінің аясында мол тәжірибесі бар тәлімгер ұстаздарды шеберлік сабағын өткізуге шақырамыз. Демек бір мезетте өз бейінінің түрлі салаларында кәсіби өсу мүмкіндігіне ие болады», дейді ол.

Театр директоры білім беру бағдарламасына шет тілін үйрену, сахналық қимыл-қозғалыс пен актерлік шеберлік енгізілетнін айтты. Себебі классикалық репертуардың айтарлықтай бөлігі итальян тілде жазылған.

Сондай-ақ, жас әртістер театр қойылымдарына қатысып, рөл сомдай алады. «Астана Опера» Камералық залы сахнасында түрлі концерт ұйымдастыру да қарастырылған. Astana Opera Халықаралық опера академиясы –жоғары білікті мамандардан білім ала отырып, жас опера әншілеріне шеберлік деңгейін арттыруға мүмкіндік беретін бағдарлама.

Театр баспасөз қызметінің хабарлауынша, вокал академиясының салтанатты ашылуы 4 шілде күні «Астана Опера» театрының Үлкен залында өтеді.

Спикердің айтуынша, ашылу салтанатына Марианджела Сицилия, маэстро Джузеппе Акуавива, Риккардо делла Шукка, Маттиа Росси (Италия), Либуше Санторисова (Чехия-Италия), Бадрал Чулуунбаатар (Моңғолия), Саян Исин (Қырғызстан) сияқты жұлдыздарды шақырылған. Сондай-ақ қазір Германияның опера театрларында өнер көрсетіп жүрген Бауыржан Әндержанов те қатысады. Қазақстандық жұлдыздар – Италия Жұлдызы орденінің иегері Медет Чотабаев, Қазақстанның еңбек сіңірген қайраткері, көптеген шетелдік байқаулардың лауреаты Жұпар Ғабдуллина, баритон Талғат Мұсабаев, «Большая опера» телевизиялық жобасының жеңімпазы Салтанат Ахметова, Айгүл Ниязов, Азамат Жылтыркөзов және қазақстандық опера сахнасының танымал тұлғалары өнерін тыңдарманға паш етеді. Сонымен бірге концертке «Астана Опера» симфониялық оркестрі, хоры және балеті қатысады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз