Жақында орын алған екі бірдей терактіден жапа шеккен 65 адам Мәскеу мен Волгоград қалаларындағы ауруханаларда жатыр. Бұл туралы ИТАР-ТАСС хабарлады.
«Әзірге жергілікті ауруханаларда 47 және Мәскеуде 18 адам емделуде, – деді Волгоград облысы губернаторының орынбасары Василий Галушкин. – Жарылыстан жапа шеккен тағы екі адамды Мәскеуге жеткізу жоспарланып отыр».
Ресейдің Волгоград қаласында тәулік ішінде екі бірдей теракт болды. 29 желтоқсан күні жергілікті теміржол вокзалында белгісіз біреу өз-өзін жарып жіберді. Ал ертеңіне тағы бір жанкешті лаңкес жолаушылар толы троллейбус ішінде үстіндегі жарылғыш құралды іске қосқан. Волгоградта орын алған лаңкестік әрекеттерденжалпы 34 адам қаза болды.
Василий Галушкин сондай-ақ Волгоград облысының билігі 10 қаңтарда теракт салдарынан жапа шеккендерге және қаза болғандардың отбасына түгел өтемақы төлейтіндерін мәлімдеді. Қазіргі уақытта 56 адамға өтемақы төленген. Қаза болған 13 адамның отбасына облыстық бюджеттен 1 млн. және федералды бюджеттен 1 млн. рубль берілді. Ал жапа шеккен 43 адам 200 мың рубль көлемінде өтемақы алған.
Айдар Өрісбаев.
Дереккөз: Itar-tass.com
Фото: Ntv.ru
