Мұхтар Тілеуберді өз сөзінде Стокгольм бастамасының көптеген іс-шаралары Қазақстанның ядролық қарусыздану және таратпау саласындағы ілгерілетуімен сәйкес келетінін атап айтты. Биыл Семей ядролық полигонының жабылуына 30 жыл және Ядролық қарудан азат Орталық Азия аймағын құру туралы шартқа қол қойылғанына 15 жыл толуын атап өтіп, Ядролық қауіпсіздік пен ядролық қарудан азат әлем үшін жаһандық көшбасшылар альянсын құру жөніндегі қазақстандық бастамаларды қолдауға және ядролық қарусыз әлемге қол жеткізу жөніндегі Жалпыға ортақ декларация туралы БҰҰ Бас Ассамблеясының кезекті қарарын қабылдауға шақырды.
Стокгольм тобының министрлік кездесуі аясында Мұхтар Тілеуберді ЕҚЫҰ-ның қазіргі Төрағасы – Швеция Сыртқы істер министрінің м.а. Анн Кристин Линдемен екіжақты келіссөздер өткізді. Тараптар Стокгольмде өтетін ұйымның министрлік кездесуі контексінде Қазақстанның ЕҚЫҰ-мен өзара іс-қимыл мәселелерін және Қазақстан мен Швеция арасындағы ынтымақтастықты нығайту жолдарын қарастырды. Атап айтқанда, жоғары деңгейдегі саяси диалог, сауда-экономикалық және инвестициялық ынтымақтастық, «жасыл экономика» және COVID-19 салдарымен күрес мәселелері талқыланды.
Сондай-ақ Мұхтар Тілеуберді Германия Сыртқы істер министрі Хайко Маас және Иорданияның Сыртқы істер және экспатрианттар істері министрі Айман ас-Сафадимен кездесті. Тараптар екіжақты ынтымақтастықты одан әрі дамыту және көпжақты форматтағы өзара іс-қимыл мәселелерін талқылады.
«Егемен-ақпарат»