Қоғам • 09 Шілде, 2021

Ғалымдардың еңбектері таныстырылды

46 рет көрсетілді

«Рухани жаңғыру» бағдарламасының аясында Алматыдағы Қайнар ака­демиясының мәжіліс залында «Білім – кітапта» атты көрме ұйымдас­тырылды. Онда Академия ғалымдарының ел тәуелсіздігі жылдарында жарық көр­ген кітаптары қойылып, жаңа кітаптарының таныстырылымы өтті.

Іс-шараны кіріспе сөзбен ашқан академия президент-ректоры, Қазақстан Ұлттық жаратылыстану ғылымдары ака­демиясының академигі, профессор Еренғайып Омаров Қазақ­стан тәуелсіздігімен бірге түлеген тұңғыш Қайнар академиясына да 30 жыл толып отырғанын айтып, жоғары оқу орнының атқа­рып жатқан қызметіне қысқаша тоқ­талып өтті.

«Қайнар академиясы өзінің құрылуы мен дамуы барысында жоғары білімді білікті кадрлармен қамтамасыз етуде елеулі үлес қосып келеді. Ашылғалы бері оқу ордасының қабырғасынан 30 мыңға жуық түлек түлеп ұшты. Олар мәдениет, білім мен ғылым, экономика салаларында және басқару ұйымдарында жемісті еңбек етіп жатыр. Мектептен академияға дейінгі үздіксіз білім беру деңгейін қалыптастыру мақсатында академия жанында «Бакалавриат» орта мектебі мен «Қайнар» колледжі жұмыс істейді. Болон үдерісіне үн қосып, әлемдік білім мен ғылым талаптарына сай болу үшін білім ордасы әлемнің айтулы 60-тан астам университетімен келісімшарт жасасып, халықаралық ынтымақ­тастықты дамыту аясындағы бір­лескен жобаларды іске асырып келеді. Академия ғалымдары 30 жыл ішінде экономика, заң, тіл білімі, педагогика пен психология, шет тілдері, журналис­тика мен информатика салала­ры бойынша 1 мыңға жуық моно­графиялық еңбектер, оқу­лықтар, оқу-әдістемелік құралдар мен элек­тронды оқу басылымдарын жазды. Мұның өзі жоғары оқу орнының профессор-оқыту­шы­лық құрамының әлеуеті жо­ғары екенін аңғартса керек. Ал бүгін таныстырылымы өткелі тұрған жаңа кітаптар да уни­верситеттік білім беру талап­тар үдесінен шығатын құнды еңбек­тер деп сенімді түрде айтуға бола­ды», деді ректор.

Академияның ғылыми жұ­мыс­тары бойынша проректоры, ҰҒА-ның құр­метті академигі, экономика ғылым­да­рының докторы, профессор Әбдіжапар Сапарбаев ректор тілге тиек еткен академия ғалымдарының 30 жыл ішінде дайындаған еңбек­­теріне қысқаша шолу жасап, білім берудің әртүрлі бағыт­тарына арналған жаңа кітаптардың мазмұнына ерекше тоқталды.

«Қайнар академиясының іргетасы қаланғалы бері мұнда еліміз­дің әйгілі ғалымдары мен педагогтері еңбек етіп, өздерінің ғылыми мұраларын көп­шілік­ке ұсынды. Атап айтқанда, филологтер Ш.Сарыбаев, Ө.Айтбаев, Н.Оралбаева, К.Құрманәлиев; заңгерлер Е.Қайыржанов, М.Бай­маханов, З.Ашитов; экономис­тер Я.Әубәкіров, А.Қошанов, Ә.Сапарбаев; тарихшылар­ Ж.Ибрашев, К.Хафизова, Т.Тілеуов; философтар Ж.Әб­діл­­дин, А.Нысанбаев, А.Қа­сым­жанов; педа­гогтер мен пси­хо­лог­тер А.Ахметов, С.Жақыпов, Х.Ше­ръяз­данова, С.Ұзақбаева, З.Мадалиева, М.Перленбетов және өзге де көптеген ғылым мен білімнің өкіл­­ін атап өтуге болады. Ғылыми-зерттеу жұмыс­тарын жүргізуде, ғылыми монографиялар мен оқулықтар жазып, оларды шығаруда академияның зияткерлік және кадрлық әлеуеті зор. Ұжы­мымызда жұ­мыс істейтін қазақ­стандық бел­гілі ғалымдар соңғы жылдары көптеген ғылыми монография мен оқулықты жарыққа шы­ғару ісінде белсенділік танытып жүр. Олар: тарих және өркениет теориясы мен ұлттық тарих саласында Е.Омаров, Г.Қәдірқұлова, Т.Тілеуов; экономика, қаржы және менеджмент бойынша Ә.Сапарбаев, С.Әбдібеков, К.Сыздықова, Г.Қалиәк­парова, Е.Гриднева; құқық саласында Б.Қалағанов, Н.Апахаев; тіл­дер және қазақ филология­сында Г.Мұхаметқалиева, А.Құрманәлиева, Ф.Сәметова, Г.Балтабаева, А.Мұхтарова; пе­дагогика мен психологияда С.Омарова, М.Перленбетов, Л.Көмек­баева, О.Фе­до­рович, М.Ер­кінбекова және бас­қа­лар. Келе­­шекте де академияның про­фессор-оқытушылары ғы­лы­ми монографиялар мен оқу­лықтар жазудан қол үзбей, қалыптасқан игі дәстүрді әрі қарай жалғастыратынына сені­міміз мол» дей келе, академик Әб­діжапар Жұманұлы жаңа оқу жылында жарық көретін ғылыми монографиялық еңбектердің жос­парымен де таныстыра кетті.

Іс-шараға Нұр-Сұлтан қала­сынан арнайы келіп қатысқан Қазақ­стан Ұлттық жаратылыс­тану ғылымдары академиясын вице-президенті (ҚазҰЖҒА), ҰҒА академигі, филология ғы­лым­дарының докторы, про­фессор Кәрімбек Құрманәлиев Қай­нар академиясының ғалым­дары ҚазҰЖҒА ака­демия­сы­ның бел­сенді мүшелері еке­нін айта келіп, қос академия ға­лым­дарының бір­лесіп орын­даған ғылыми жобалары, зерт­теулері және монографиялық еңбектері қазақ­стандық ғылымды одан әрі да­мытуға қосқан сүбелі үлесі деп бағалады.

Кітаптар тұсаукесерінде сөз алған «Қазақ психологиялық қоға­мы» рес­публикалық қоғамдық бірлестігінің президенті, психология ғылымдарының докторы, профессор Мұқан Перленбетов пен профессорлар Салтанат Омарова және Бақытбек Қала­ғанов ғалымдардың жаңа туындыларын жоғары бағалап, білім алушылардың кәдесіне жарар құнды кітаптар екенін айтты.

Тұсаукесер рәсімін қорытын­дылаған Қайнар академиясының президент-ректоры Еренғайып Омаров Қазақстан Тәуелсіздігінің 30 жылдығына орай академия ғалымдары шығарған 1000 кітап  Ұлттық кітапханасына тарту еті­летінін мәлім етті.

Іс-шара Академия ұйым­дастырған «Білім сапасын қамта­масыз етудегі заманауи трендтер» атты халықаралық ғылыми-тәжі­рибелік конференцияға ұласты.

 

Фаузия САМЕТОВА,

филология ғылымдарының
кандидаты, профессор

 

Соңғы жаңалықтар

Шерхан Мұртазаның үйі

Әдебиет • Кеше

«Жасыл» аймақта екі өңір

Коронавирус • Кеше

Бүгін - Аналар күні

Қазақстан • Кеше

Әлемде эпидахуал қандай?

Әлем • 18 Қыркүйек, 2021

Токио марафоны 2022 жылға шегерілді

Спорт • 18 Қыркүйек, 2021

Алматыда тау бөктері өртеніп жатыр

Аймақтар • 18 Қыркүйек, 2021

Ұқсас жаңалықтар