Індет білінгелі бері облыста коронавирус инфекциясының 7 392 жағдайы тіркелген. Оның 3 392-сі өткен жылы анықталса, 4 мыңы жыл басынан бері белгілі болып отыр. Былтыр шілде айында 1 775 науқас тіркеліп, өршіген дерт жұрттың есін шығарған еді. Биыл індет 1 540 адам байқалған сәуір айында көп тіркелді. Мамыр айының үшінші онкүндігінен бастап азайып, маусымның ортасында тәулігіне 6-7 адамға дейін төмендеді.
– Бірақ елімізден мутацияланған үнді штамы байқалып, эпидемиялық ахуал күрделеніп кеткенін білесіздер. Оның балалар арасында, 1 жасқа дейінгі нәрестелерден анықталуы бізді алаңдатып отыр. Облыстан республикаға референс зертханасына 22 сынама жолданып, оның 13-інен үнді штамының серотипі анықталды, – дейді департамент басшысы.
Дүниежүзілік денсаулық сақтау ұйымының дерегі бойынша «Дельта» әлемнің 200-ге жуық елінен байқалған. Оның жұғу жылдамдығы алдыңғыларға қарағанда 60 пайызға жоғары және инкубациялық кезеңі де 2 есе қысқа. Яғни вирустың бұл түрі үлкенге де, кішіге де қауіп.
– Инфекциядан қорғанудың бірден бір жолы вирусқа қарсы вакцинаның толық курсын алу, – дейді Динара Жаңабергенова. – Облыста екпе жасайтын 106 кабинет бар. Жеті мониторингтік топ емдеу мекемелерінде вакциналарды тасымалдауға, «мұздай тізбек» ережелерінің сақталуына, екпе салуда регламент талаптарының, арнайы ережелердің бұзылмауына, екпе алған тұрғындарға медициналық бақылау жасалып, мәліметтердің «Вакцинация» модуліне енгізілуіне жүйелі түрде мониторингтік бақылау жасап отыр. Кемшіліктер облыстық штабта қаралып, қорытындысы бойынша тиісті лауазымды тұлғаларға хаттамалық тапсырмалар берілуде.
Медициналық ақпараттық жүйенің деректеріне сәйкес биылғы 1 ақпан мен 6 шілде аралығында облыста вакцинаның 1 компонентін ектіргендер саны 173 630 адамға жеткен. Екінші бөлігін 93 338 тұрғын алыпты.
Департамент басшысы талап пен тыйымды елемей түрлі отбасылық шара, мерекелерді өткізетіндер азаймай отырғандығын да айтып өтті. Өңірдегі 167 мониторингтік топ жыл басынан бері 10 621 нысанға рейд жасаған. Тексеру кезінде карантин талаптарын бұзудың 343 дерегі анықталып, айыппұл салынды.
Брифингте Динара Олжабайқызы тым қауіпті вирус түрін жұқтырудан аулақ болу үшін көпшілік жерлерге баруды доғара тұрып, мерекелік іс-шараларды онлайн форматта өткізу жөн екенін айтты.
Қызылорда облысы
