Орал қалалық кітапханалар жүйесі бұл іс-шараны ел Тәуелсіздігінің 30 жылдығы қарсаңында және 2021 – «Балалар әдебиеті» жылы аясында ұйымдастырған екен. Орал қаласы әкімінің орынбасары Ерлан Ғалиев, қалалық мәдениет және тілдерді дамыту бөлімінің басшысы Серік Қайырлиев, қалалық кітапханалар жүйесінің меңгерушісі Ганди Ізтұрғанқызы іс-шараға бастан-аяқ қатысып, қолдау көрсетті. Іс-шара барысында қаладағы «Жәңгір хан», «Дана» кітап дүкендері, «Зерек» оқу орталығы, «Аığanym», «Қуаныш» жеке кәсіпкерлері саябақ келушілеріне кітап өнімдерін ұсынды. Мектеп оқушылары арасында «Менің сүйікті кейіпкерім» атты жас суретшілер байқауы ұйымдастырылды. Ал оқырман қауыммен кездесуге Ақжайық қаламгерлерінің ақсақалы, ақын Айтқали Нәріков, айтыс ардагері Шолпан Қыдырниязова, Қазақстан Жазушылар одағының мүшелері Дариға Мұштанова, Талап Таймасұлы, Бауыржан Ғұбайдуллин секілді жергілікті қаламгерлер келді.
«Бұл іс-шараның мақсаты – оқырмандардың кітапқа деген қызығушылығын арттыру, сонымен қатар баспалардың, авторлардың, мәдениет және білім беру мекемелерінің, кітап сатушы ұйымдардың шығармашылық және іскерлік ынтымақтастығын нығайту», дейді Ганди Ізтұрғанқызы.
Кітап жәрмеңкесінің қалалық мәдениет және демалыс саябағында, ашық аспан астында өткізілгені жиылған халыққа да, қаламгерлерге де ерекше әсер етті. Жергілікті ақындардың өлеңдерінен құралған поэтикалық көріністі Орал қалалық жастар мәдениет үйінің әртістері «тірі әуенмен» әрлеп тұрды. Үлкендер жағы поэзия алаңқайына үйірілсе, балалар жасыл шалғынға жата кетті. Саябақ басшылығы бұл жағдайды да ойластырған екен, жерге отырам деушілерге арнайы кілемшелер таратты. Әдемі жиынның шырайын лезде төгіп өткен ақ жаңбыр да бұза алмады.
– Осындай кітап жәрмеңкесін ұйымдастырған қалалық кітапханаға мың алғыс айтамын. Форматы ерекше іс-шара болды. Бұл күнгі алғашқы оқырманым Арайлым деген қызыма қолтаңбаммен қоса ақ батамды бердім. Жазушы мен кітапты оқырманымен табыстырған керемет кездесу болды, – дейді қаламгер Дариға Мұштанова. Дариға Ғазезқызы бүгінгі кездесуден ерекше шабыт алғанын, біраздан бері қаңтарылып қалған қаламын қайта қолға алып, бастап қойған шығармасын аяқтауға асығып отырғанын жасырмады.
Балалар жазушысы Бауыржан Ғұбайдуллин де жас ұрпақты кітап қазынасымен, әдебиет әлемімен табыстыру үшін осындай креативті іс-шараларды көбірек ұйымдастыру қажеттігін айтты.
– Біз бірер жылдан бері Орал қаласында кітап дүкенін ашып, еліміздің түрлі баспаларынан ең үздік, сұранысқа ие деген өнімдерін әкеліп жатырмыз. Әрине, біздің «DANA» рухани орталығын қазірдің өзінде оралдықтар жақсы біліп қалды. Дегенмен осындай іс-шаралар өте керек екен. Халық көп жиналатын орындарға жиі шығып, әдебиетті, кітап әлемін насихаттаудың қажеттігіне көзім анық жетіп отыр, – дейді Жантас Сафуллин.
Жас ақын Дәурен Шамұрат жүргізген емен-жарқын кездесуде әр қаламгер өзінің шығармашылық жоспарларын бөлісіп, өлең оқыды. Іс-шара соңында әдебиет кешінен әсерленген халық арасынан суырылып шығып, өз өлеңдерін оқып берген оқырмандар да болды. «Осындай шынайы кездесулерді жиірек өткізу керек екен» деген ойды ұйымдастырушылар да, қаламгерлер де көңіліне түйіп кетті.
Айтпақшы, осы кітап жәрмеңкесі кезінде «Менің сүйікті кейіпкерім» атты суретшілер байқауы өткенін айтқан едік. Шара соңында байқау қорытындыланып, көңіл түкпіріндегі кейіпкерін алуан түспен қағаз бетіне көшірген балғын суретшілер Айсұлу Хасанғалиева, Айқын Әділұлы, Саягүл Құлмұханова, Жанерке Тілекқабыл, Мәдина Беркін, Софья Щукина, Әлина Ишкенова, Мария Климова, Әлина Өтеуова арнайы сыйлықтарға ие болды.
...Бір кездері атақты ақын Қасым Аманжолов:
«Шағанның бойы көк шалғын,
Шалқамнан жатқам
шаңқай түс,
Гүл болып менің құшағым,
Кеудемде қонған бұлбұл құс!» – деп жырлаған екен. Араға бір ғасыр салып дәл осы жерде өткен керемет іс-шараға қатысқан әр жанның да кеудесінде бір-бір бұлбұл сайрап кеткендей көрінді.
Батыс Қазақстан облысы
