Қара теңіз жағалауында жалауы желбіреген жарыста Магнус Карлсен, Фабиано Каруана, Левон Аронян, Шахрияр Мамедьяров, Александр Грищук, Аниш Гири, Әлиреза Фируджа, Сергей Карякин және тағы басқа жұлдыздар өнер көрсетеді.
Әйелдердің де құрамы өте күшті. Бұрымдылар арасынан Александра Горячкина, Екатерина Лагно, Мария мен Анна Музычук, Нана Дзагнидзе, Харика Дронавалли, Тан Чжунъи, Александра Костенюкті бөле-жара атап өтуге болады. Олардың алды әлем чемпионы болса, өзгелері көптеген халықаралық додаларда табысты өнер көрсетіп жүрген сақа спортшылар.
Нокаут-жүйе бойынша өтетін жарыстың жүлде қоры 2 568 750 АҚШ долларын (ерлер – 1 892 500, әйелдер – 676 250) құрап отырғанын да айта кетейік. Сочидегі турнир 8 тамызда өз мәресіне жетеді.
Биылғы әлем кубогында Қазақстанның төрт шахматшысы шеберлік байқасады. Әйелдер арасында Жансая Әбдімәлік, Динара Сәдуақасова және Бибісара Асаубаева бақ сынаса, ерлер сайысында Ринат Жұмабаевқа сенім артылуда.
