Сайлауға сақадай сай

Соның ішінде 61 әкімнің өкілетті мерзімі аяқталған, ал қалған 10 әкімнің өкілетті мерзімі тоқтатылған.

Облыстық сайлау комиссиясының төрағасы Тілеген Қаскиннің айтуына қарағанда облыста сайлау кезінде 994 адамды жұмыспен қамтыған 14 аумақтық, 174 учаскелік сайлау комиссиялары жұмыс істейтін болады. Бұлар облыстың 218 елді мекендерінде орналасқан. Ал сайлау учаскелері ашылмаған 54 елді мекеннің сайлаушылары учаскелерге арнайы бөлінген көліктермен жеткізіледі. Сайлаушылардың жалпы саны 60471 адам. Соның ішінде ең көп дауыс беретіндер, әрине, аудандық маңызы бар Мамлют қаласының әкімін сайлайтындар. Олардың саны 5366. Ал ауылдық округтер арасында ең көп сайлаушы Ғ.Мүсірепов ауданындағы Нежин ауылы. Онда 1941 сайлаушы бар. Осы сайлауда 18 жасқа енді толған 280 сайлаушы тұңғыш рет дауыс береді.

Сайлауға түсетін үміткерлерді тіркеу 9 шілдеде аяқталған. Олардың саны 237 адам болды, соның ішінде 74-ін саяси партиялар ұсынған, қалғандары өзін-өзі ұсынушылар. Бір орынға орта есеппен 3,3 үміткерден келді. Бірақ 9 округте таласқа түсетіндер саны 4 адамнан болды. Бес адамнан тұратын ең көп үміткер Қызылжар ауданындағы Бугровой ауылдық округынде тіркелді. Барлық үміткерлердің 30 пайызға жуығы әйелдер. 110 кандидат немесе 48,5 пайызы бұрыннан мемлекеттік қызмет атқарып келе жатқан адамдар. Соның ішінде 43-і осы кезге дейін әкімдік лауазымды атқарып жүргендер.

Саяси партиялардың арасында ең көп - 58 кандидат ұсынған Nur Otan партиясы. Қалған партиялар 2-3 адамнан ғана ұсына алды. Тек бұрынғы коммунистік, қазіргі «Қазақстанның Халық партиясы» ғана  6 үміткер ұсынған. Ауыл әкімдерін сайлауға «Ауыл» партиясы небары 3-ақ кандидат тіркетті.

13 шілдедегі мәліметке сәйкес тексерілгенде барлық 237 кандидаттың 223-нің құжаттарынан ешқандай шикілік шыққан жоқ. Ал 14-нің құжаттарынан заңға қайшылық табылып, сайлауға түсуге тиым салынды. Бұл жұмысқа барлық тиісті өкілетті органдар тартылды. Соның ішінде Көші-қон полициясы, Прокуратура, Мемлекеттік қызмет департаменті бар.

Сайлауға түсетін үміткерлердің арасында «Болашақ» бағдарламасымен оқыған бір азамат бар. Ол Уәлиханов ауданындағы «Қайрат» ауылдық округының әкімдігінен үміткер болып тіркелген. Барлық үміткерлер  жоғары білімді, мамандықтары бойынша 15,2 % – экономист, 16,9 % – заңгер, 38,4 % – педагог және 8 % – ауылшаруашылығының маманы. Үміткерлердің орташа жасы – 41. Ең жасы 27-де. Ал ең тәжірибелі, жасы үлкені Ғ.Мүсірепов ауданындағы Қырымбет ауылдық округыне әкім болуға үміткер болып отыр. Оның жасы 62-де.

Сайлау алды үгіт жұмыстарын жүргізуге әрбір ауылдық округке сайланатын кандидатқа 220 мың теңгеден, ал аудандық маңызы бар қалаға әкім болғысы келетіндерге 230 мың теңгеден бюджеттен қаражат бөлінеді. 

Бүгінгі күнге облыстағы сайлау науқаны қолданыстағы заңнама талаптарына, бекітілген күнтізбелік жоспарларға сәйкес жүргізілуде. Сайлау комиссияларына өтініштер мен шағымдар түскен жоқ.

Сайлау науқанын өткізу барысы туралы барлық жедел ақпарат облыстық және аудандық сайлау комиссияларының интернет-беттерінде орналастырылған.