Аймақтар • 15 Шілде, 2021

Партия үміткері сайлаушылармен кездесті

Осы жылдың 25 шілдесінде Қызылорда облысынан ауыл әкімдерінің сайлауына 131 үміткер қатысады. Облыстық сайлау комиссиясының дерегінше олардың басым бөлігі өзін-өзі ұсынғандар. Үміткерлерді ұсыну және тіркеу кезеңі өтіп, үгіт-насихат жұмыстары басталды, деп хабарлайды Egemen.kz.

Мұрат ЖЕТПІСБАЕВ

Осыған байланысты ҚР Парламенті Мәжілісінің депутаты, мәжілістегі фракция мүшесі Геннадий Шиповских, «Nur Otan» партиясы Орталық аппаратының қызметкері Гүлнар Нұрахметханова және партия атынан Қармақшы ауданындағы Ақай ауылы әкімдігіне үміткер Эльмира Қазиева тұрғындармен кездесті.

Карантин талаптарына сай ауылдық клуб алдында өткен кездесуге ауыл тұрғындары, ақсақалдар, жастар жиналды.

Кездесуде Г.Шиповских партияның сайлауалды бағдарламасының Жол картасы негізінде атқарылып жатқан және жүзеге асырылған жұмыстарға тоқталып өтті.

- Партияның 5 жылға арналған сайлауалды бағдарламасында бұл ауылға қатысты да біраз жаңалық бар. Қазір облыс бойынша Жол картасында жобаланған жұмыстардың 16% жүзеге асырылып отыр. Атап айтар болсам, 6000 ға жуық тұрғыны бар Ақай ауылдық округіндегі электр желілерін кеңейту және қайта жаңғырту жүзеге асып, оның игілігін ел көруде, - деді депутат.

Кездесуге алдағы өтетін ауыл әкімдерінің тікелей сайлауында Ақай ауылдық округі әкімдігіне «Nur Otan» партиясынан үміткер Эльмира Қазиева жерлестеріне өзінің сайлауалды бағдарламасын жан-жақты таныстырды.

Үміткер округ әкімі лауазымына сайланған жағдайда алған білімі мен өмірден жинақтаған іс-тәжірибесін ауылдастарының әл-ауқатын, тұрмыс-тіршілігін жақсарту үшін және шаруашылық құрылымдарының экономикалық нығаюына жұмсайтынын айтты. Халықтың бұқаралық спортпен айналысуына, ауылдағы мәдениеттің дамуына мүмкіндік жасап, жастардың бос уақытын тиімді пайдаланатын іс-шаралардың ұйымдастырылуына, партиялық жобалардың жүзеге асуына және жұмыссыз жастардың өмірден өз жолын табуына ықпал ететін жеткізді.

Кездесу барысында ауыл тұрғындары өздерінің талап-тілектері мен ұсыныстарын айтты.

Күннің маңызды және өзекті жаңалықтарын «Егемен Қазақстан» телеграм каналынан оқыңыз