Үш жігіттің бастамасы Алматының ауасын тазартуға арналған

Бұл бастама 2020 жылдың қазан айында қолға алынған болатын. Жоба қыс бойы Медеу-Шымбұлақ бағыты бойынша белсенді жұмыс істеді, ал кейінірек электромобильдердегі такси жұмысы бүкіл қаланы қамтыды. Қазір компания клиенттерінің қатарында қонақүйлер, компаниялар, жеке тұлғалар бар. Компания жұмысқа кіріскелі бері экологиялық көлікте 30 мыңнан астам жолаушыны тасымалдады. Жолаушылардың басым бөлігі – Қазақстанның өзге өңірлерінен, ТМД елдерінен келген қонақтар мен шетелдік туристер.

«Біздің жоба Алматы ауасындағы көмірқышқылдың көлемін 200 килодан астам төмендетуге мүмкіндік береді және жыл сайын экотасымалды қамтуды ұлғайтуды жоспарлап отырмыз. Негізгі мақсатымыз – электромобильдердің артықшылығын көрсету. Біздің көліктер ауаға зиянды газдарды шығармайды, дыбыссыз және техникалық қызмет көрсетуі де қиындық тудырмайды әрі үнемді. Электромобильде 100 шақырым жүрістің бағасы үйде қуатталғанда бар болғаны 250 теңге тұрады. Сонымен қатар бұл авто­мобильдер үшін көлік салығы, ли­цензиялық алым жоқ, алғашқы тіркеу кезінде 50% жеңілдік қолданылады. Сондай-ақ, электромобильде мотор жоқ, сәйкесінше жанар-жағармаймен жүретін автомобильдермен салыстырғанда май мен басқа да материалдарға шығын аз кетеді», – дейді компанияның құрыл­тайшысы Әуез Төлегенов.

Үш жігіт ұйымдастырған Blue Sky Energy стартапына 100 млн теңгеге жуық қаражат салынған. Олар компания халық-­
аралық әуежай аумағында қызмет көрсету үшін 9 электромобиль сатып алды, қала бойынша 5 қуаттау станциясын орнатты. Ал 2020 жылы Qoldaý кәсіпкерлік орта­лы­ғы­ның қолдауымен «Бизнестің жол картасы-2025» мемлекеттік бағдарламасы аясында кәсіпкерлерге электромобильдерге арналған қуаттау стансасын орнату үшін 3,2 млн теңге көлемінде қайтарымсыз грант берілді. Жоба 30-дан астам жұмыс ор­нын ашуға мүмкіндік бергенін атап өткен жөн.

«Біздің таксопарк бір тәулікте өте көп жолаушыны тасымалдайды. Біз жо­ба ар­қылы адамдар электртаксиімен жүре алатын болса, онда олар өздері де электро­м­обильді жүргізе алатынын көрсеткіміз ке­леді. Сонымен қа­тар электр­­таксиде 1 шақы­рым жүру көмір­қыш­­қыл газының шыға­рындысын 1 грамға азай­тады, ал жыл­дық пайдалану кезінде бұл енді грамм емес, тонна болады. Осылай­ша, электро­мобильге ауысып, алматылық­тар қала экологиясын жақсартуға үлес қоса алады. Болашақ ұрпақ үшін таза ауа қалдыру аса маңыз­ды. Көптеген адам электромобильдерді ауқатты азаматтар алып келеді деп санайды. Тіпті кей адамдар электромобильдің ша­ма­мен 7 млн теңге тұратынын білмейді. Со­ны­мен қатар Қазақстанда қуаттау стан­­са­ларының желісі дамымаған. Бола­шақта біз экологиялық таза көлік түр­леріне кө­шеміз деп ойлаймын. Бұл қазір да­мыған елдерде байқалып отырған тренд», деді Әуез Төлегенов.

Компания 2026 жылға қарай эко-таксопаркті 500 электромобильге дейін көбейтіп, қуаттау электр стансаларын 300-ге дейін ұлғайтуды жоспарлап отыр. Сондай-ақ жобаны еліміздің ірі қалаларында дамыту ойда бар. Бұған қоса, жас кәсіпкерлер Еуропа мен АҚШ-тағы электромобильдерге сұраныстың артуына байланысты шетелден инвести­ция тартуға үмітті.

АЛМАТЫ