Ұлттың рухани кемелденуіне, ұлттық және әлемдік әдебиеттің киелі сахна арқылы оқырманына жетуіне қызмет ететін театр өнерінің бар жауапкершілігін мойнына алған ұжым алғашқы күннен бастап бұл миссияны түсіне білді және соның жолында тынымсыз еңбек етіп келеді.
Елбасының «Ұлы даланың жеті қыры» бағдарламасын іске асыру мақсатында ел Тәуелсіздігінің 30 жылдығы мен театрдың қазақ труппасының құрылғанына 30 жыл толу мерекесіне орай облыста «Ұлы дала театр керуені» атты гастарольдік сапар ұйымдастырылған болатын. Бұл – театрдың жаңа жобасы. Осы жоба аясында театр ұжымы облыстағы аудан орталықтары мен ауылдарға гастрольдік сапармен барып қайтты. Жоба екі бағытта жүргізілді: бірінші топ Абайдың туғанына 175 жыл толуына байланысты ұлы ойшылдың және жергілікті ақын-жазушылардың шығармашылығын насихаттау мақсатында әдеби-танымдық кештер ұйымдастырды. Ал екінші бағыттағы топ көрерменге С.Ахмадтың «Келіндер көтерілісі» комедиясын, Ұ.Есдәулеттің «Қара пима» драмасын және балаларға арналған М.Әлібектің «Алдар көсенің сиқырлы дүрбісі» ертегісін ұсынды.
– Бұл жоба мақсаты – көрерменді рухани құндылыққа тәрбиелей отырып, театр әлеміне қызығушылығын арттыру, театр өнерін кәсіби тұрғыда дамыту, қазақ қаламгерлерінің шығармашылығын насихаттау, ұлтымыздың мәдениетін, салт- дәстүрін жандандыруға атсалысу, тұрғындардың өткен шарадан алған пікірін саралай отыра, театр өнерін өркендетудің сратегиялық жоспарын жасау, – дейді Тахауи Ахтанов атындағы Ақтөбе облыстық драма театрының директоры Олжас Ибраев.
Театр ұжымы Шалқар, Әйтеке би, Алға аудандары секілді бірнеше елді мекендегі көрерменімен қауышты. Соңғы бір-екі жылдықта әлемді жайлаған қауіпті індеттің салдарынан карантиндік шектеулер жарияланып, бір-бірімен еркін араласуға да мүмкіндігі болмаған аудан, ауыл тұрғындары үшін театрдың келуі қуанышты жаңалық болды. Театрдың бұл жобасы осы рухани оқшауланудың орнын толтырғандай болды.
Маусым айының аяғында театр ұжымы Бершүгір, Шалқар, Қарабұтақ, Ақай, Қарақобда ауылдарына барып, бірнеше қойылымды көрермен назарына ұсынды. Ал екінші топ Шалқар, Әйтеке би аудандарында «Абай әлемі» атты әдеби-поэзиялық кеш өткізді. Бұл әдеби шараның мақсаты – жастардың қазақ әдебиетіне, мәдениетіне деген қызығушылықтарын оятып, Абай шығармашылығын насихаттау. Өнерпаздар Абай өлеңдерімен қоса қазақтың халық әндерін орындап, жиылған көрерменге де ақынның қарасөздерін кезектесе оқуға мүмкіндік берді. Әсіресе, балалар белсенді болды.
– Карантиндік шектеу шараларының жеңілдеуіне байланысты гастрольдік сапарымызды аудандардан бастадық. Театрымыз өзге өңірлерге үздік қойылымдарымен үлгі болуы керек. Бұл іс-шарамыз ең әуелі сахна майталмандарына шығармашылық тәжірибе сыйлады, әрі ізденіске жол ашты, – дейді театр директорының орынбасары Жандос Жәумітұлы.
Гастроль аяқталар тұста театр ұжымы Алға ауданындағы Ақай, Қарақобда секілді бірнеше ауылға барып қайтты. Балаларға арналған Мейіржан Әлібектің «Алдар көсенің сиқырлы дүрбісі» ертегісінде қазіргі шетелдік мультфильмдердің Өрмекші адам, Макуин, Маша секілді кейіпкерлері де сахнаға шығарылған болатын. Оны көрген балалар өздері образға кіріп, мәз болысты. Ал кешкі уақытта таяуда ғана театрда премьерасы өткен Ұлықбек Есдәулеттің «Қара пима» психологиялық драмасы ұсынылды.
– Ел арасында түрлі проблема болады. Көрермен бұл қойылымды ықыласпен тамашалады. Көрерменнің пікірін тыңдап, қоғамдағы «маскүнемдік» мәселесінің ешқашан ескірмейтіндігін байқадық, – деді театр директорының орынбасары Жандос Жәумітұлы.
Ал осыдан бірнеше ай бұрын режиссер Айдын Салбанов сахналаған Барзу Абдуразаковтың «Айналайын» драмасында екі кейіпкер ғана бар: ана мен бала.
– Қойылымда ана рөлін сомдаған актриса Майра Ильясованың бұл образы ерекше болды: актриса жүрегі нәзік те, қайсар ана рөлін өз биігінде орындап шықты. Ана мен баланың диалогы әрбіріміздің жүрегіміздің түкпірінде жатқан сезімдерді оятқандай болды, – дейді көрермендер.
Мейрамгүл РАХАТҚЫЗЫ
